Vâ tơniăn hneăng tơ’noăng mơgêi râ má pái phôh thong hơnăm 2023 tơkŭm po tơniăn, châ tơƀrê hên, Vi ƀan kong pơlê Lâm Đồng ai mơ-éa thâ hnê mơhno mâu tíu cheăng hbrâ tŭm mâu tơmeăm ki kal xúa, ôh tá ăm ai tơdroăng hok tro ki lâi lôi tơ’noăng xua tơdroăng cheăng kâ pá puât. Hneăng tơ’noăng mơgêi râ má pái phôh thong hơnăm kố, kong pơlê Lâm Đồng ai lối 14.600 ngế hok tro veăng tơ’noăng.

Rơtế tơkŭm po 39 tíu tơ’noăng, 670 kơbong tơ’noăng a 12 tơring, pơlê kong kơdrâm tung kong pơlê, Lâm Đồng xuân hbrâ tŭm mâu tơmeăm khoăng ƀă mơngế pêi cheăng tâk troh lối 2.600 ngế veăng kum hneăng tơ’noăng mơgêi râ má pái.

Vâ tơniăn hneăng tơ’noăng tơkŭm po tơniăn, hâi lơ 27/6, Vi ƀan kong pơlê Lâm Đồng hiăng ai mơ-éa thâ pơkâ Khu pơkuâ hnê hriâm – Hnê mơjiâng tuăn ngôa rơkê, Vi ƀan mâu tơring, pơlê kong kơdrâm ƀă mâu tíu cheăng tơkŭm hnê mơhno hbrâ tŭm, nhên mâu tơdroăng pơkâ. Tung mê, ôh tá ăm ai tơdroăng hok tro lôi pơtê tơ’noăng xua tơdroăng prôk lăm lơ cheăng kâ rơpŏng pá puât, ki má lối cho mâu hok tro a hơngế, hok tro mơngế hdroâng kuăn ngo, kuăn ‘nĕng ối tung rơpŏng kơtiê.