VOV4.Xơ Đăng - Hâi lơ 26/7, Khu râ kăn séa ngăn dêi Kuô̆k hô̆i xua Thươ̆ng tươ̆ng Trần Quang Phương, Kăn cheăng tung Tíu xiâm Đảng, Kăn phŏ hnê ngăn Kuô̆k hô̆i pơkuâ xiâm hiăng ai roh pêi cheăng ƀă Vi ƀan kong pơlê Lâm Đồng ‘na pêi pro kơdĭng, hbrâ mơdât mơ’nhê liăn tê kơtê hneăng hơnăm 2016 – 2021. Tung pơla kố nah, Lâm Đồng hiăng tơkŭm pơkuâ krá tơniăn tơdroăng xo mơ’no liăn ngân tơnêi têa, tơniăn xo hnoăng liăn tro, xo tŭm, mơdât tơdroăng ôh tá châ xo ƀă kơdroh liăn chĕn hnoăng mơhá.

Tâi tâng roh pêi cheăng

Tơdrêng amê, pơkuâ tơtro tơdroăng mơ’no liăn ngân rêm hơnăm. Tung mê, kơdĭng châ 326 rơtal liăn, kơxô̆ liăn mơ’no ăm tơdroăng pơkuâ liăn ngân, lối 23 rơtal 800 rơtuh liăn kơxô̆ liăn hnê hriâm ƀă hnê mơjiâng tuăn ngôa rơkê, lối 23 rơtal 500 rơtuh liăn khăm pơlât ƀă hía hé.

Xông tơpui a roh pêi cheăng, teăng mâ khu râ kăn séa ngăn, thươ̆ng tươ̆ng Trần Quang Phương, Kăn xiâm phŏ hnê ngăn Kuô̆k hô̆i mơnhên, kheăn kơdeăn mâu tơdroăng mơ-eăm dêi kong pơlê Lâm Đồng tung pêi pro tơdroăng kơdĭng liăn, hbrâ mơdât mơ’nhê liăn tê kơtê hneăng hơnăm 2016 – 2021.

Tơdrêng amê, pơkâ thế kong pơlê kal tơmâng tâ mê nếo tơdroăng pơ’lêh pơkuâ tơnêi têa, môi troăng – môi troăng tơrŭm tâi tâng, pơchân Lâm Đồng kal pơtối tơkŭm séa ngăn ƀă tơleăng mâu roh tơdroăng săm tối săm tơkêng ki tơdjâk tơnêi tơníu. Tơmâng tâ mê nếo troh tơmeăm ki ai hlâu dêi Đà Lạt, mơjiâng pro troăng klông tiô rơxông nếo, tơtro ƀă troăng prôk lâp plâi tơnêi.

A Sa Ly tơplôu ƀă tơbleăng