VOV4.Xơ Đăng - Kơxo lơ 14/10, kong pơlê Lâm Đồng hiăng tơbleăng hlá mơ-éa ki kal dêi Kăn hnê ngăn Vi ƀan kong pơlê ‘na tơdroăng hbrâ ví tơdroăng têa kân lân lu, rơlêa, tơnêi tơhnah tơhnâp a tung kong pơlê. Drêng ai kong prâi pro ôh tá tơniăn, tiô tối hdrối tung mâu hâi la ngiâ, tung kong pơlê Lâm Đồng ai kong mêi kân, khía pê têi, tơ’lêi tro têa rơlêa, lân lu ƀă tơnêi tơhnah tơhnâp a hên kơpong.

Lâm Đồng dế thâ pêi pro mâu troăng hbrâ ví xía vâ kong prâi pro ôh tá tơniăn

Vâ kơdroh tro lŭp má môi ‘na prá lâi, tơmeăm khoăng ƀă gâk kring tơniăn ăm kuăn pơlê, Kăn hnê ngăn Vi ƀan kong pơlê pơkâ Khu hnê mơhno hbrâ, mơdât pơreăng ƀă ti tăng tŏng xo mơngế hliăng tiâ, mâu khu cheăng, kơvâ cheăng, râ cheăng ƀă Vi ƀan mâu tơring, pơlê kong kơdrâm tung kong pơlê thâ pêi pro tơdrêng mâu troăng hbrâ ví ƀă kong prâi hơ’lêh. Ki rơhêng vâ tối tơtrŏng tơkŭm gâk plâ hâi plâ măng, hnê mơhno teăm tơdrêng, hbrâ pêi pro tơdroăng hbrâ ví tiô troăng ‘’pŭn tơdrêng’’, ‘’pái hbrâ rơnáu’’; teăm xĕn kuăn pơlê a mâu kơpong rơ-iô ai têa kân rơlêa, lân lu, tơnêi tơhnah tơhnâp troh ối a tíu tơniăn.

VOV Tây Nguyên/Tơplôu: A Sa Ly