Kố cho mâu tơmeăm pro ối tung rôh châ pơxiâm po má péa tung a tơdế khế 3 hơnăm kố, tiô tối hdrối kô pro klêi a khế 6/2027 tiô troăng pơkâ dêi Khu xiâm ngăn cheăng kal kí. Pái to hngêi trung ai tíu kâ koi ối pơtê péa râ kố châ pơxiâm pro a hâi 19/3/2026 a mâu cheăm tơkăng kong Dak Wil, Thuận Hạnh ƀă Tuy Đức, ƀă tâi tâng kơlo liăn pro vâ chê 678 rơtal liăn.

Rêm toăng châ pro vâ chê 226 rơtal liăn, pro 30 toăng lâm hriâm sap ing lâm 1 troh lâm 9, tŭm tơdroăng vâ hriâm, ối pơtê ăm lối 1 rơpâu ngế hok tro ƀă thái cô ối. Cheăng xo tơnêi, Vi ƀan hnê ngăn kong pơlê Lâm Đồng hiăng pêi cheăng ƀă ngế ki ‘no liăn pro, Vi ƀan mâu cheăm ƀă mâu tíu pêi cheăng ki ai tơdjâk troh. Mâu cheăm tơhrâ kô pêi pro klêi cheăng xo tơnêi hdrối hâi lơ 30/6 la ngiâ vâ rak tơniăn tro tơdroăng ki tơbleăng tro tơdroăng tơkêa.