VOV4.Xơ Đăng Troăng kân tơdrăng Dầu Giây – Liên Khương ai tâi tâng ki xŏn dâng 200km, châ klâ pro 3 tơdroăng tơkêa mê cho: Dầu Giây – Tân Phú, Tân Phú – Bảo Lộc ƀă Bảo Lộc – Liên Khương. Tung mê, 2 tơdroăng tơkêa: Tân Phú – Bảo Lộc ƀă Bảo Lộc – Liên Khương, tâi tâng ki xŏn vâ chê 140km xua Vi ƀan hnê ngăn kong pơlê Lâm Đồng – Kơ koan Tơnêi têa ai hnoăng pơkuâ pêi pro.

Kuăn pơlê kong pơlê Lâm Đồng tơmâng ngăn, ngăn lơ gât ki vâ pro troăng prôk

Tiô Vi ƀan hnê ngăn kong pơlê Lâm Đồng, kong pơlê kô xoăng 4.500 rơtal liăn tung tâi tâng kơxô̆ 16.200 rơtal liăn ăm 66km troăng kân Tân Phú – Bảo Lộc; xoăng 10.800 rơtal tung tâi tâng kơxô̆ 12 rơpâu rơtal liăn, ăm 73km dêi tơdroăng tơkêa pro troăng prôk Bảo Lộc – Liên Khương. Kố cho kơlo liăn ki hrê hên má môi dêi kong pơlê Lâm Đồng sap ing hdrối nah troh nôkố ăm môi tơdroăng tơkêa pro troăng prôk. Pôa Trần Văn hiệp, Kăn hnê ngăn Vi ƀan kong pơlê Lâm Đồng ăm ‘nâi, troăng Dầu Giây – Liên Khương cho tơdroăng rơhêng vâ khât dêi kăn ƀô̆ ƀă kuăn pơlê kong pơlê Lâm Đồng. Xua mê, kong pơlê hiăng mơeăm hbrâ rơnáu, rak vế mâu tơdroăng ki kal vâ hbrâ rơnáu pơxiâm protơdrêng hlối drêng tơdroăng tơkêa châ Ngế pro xiâm hnê ngăn Chin phuh kĭ pơkâ ‘no liăn ăm pro.

Katarina Nga tơplôu ƀă tơbleăng