Rơtế ƀă tơdroăng mơđah tơbleăng ki hên a Đà Lạt, ai lối 40 tơdroăng mơhnhôk xuân tơkŭm po lâp tơring ki ê tung kong pơlê. Nôkố mâu tơdroăng mơhnhôk hiăng chôa ‘lâng tơkŭm po a mâu tơring, pơlê kong kơdrâm tung kong pơlê, môi tiah: Khu sâp ếo xŏn reăng, mơđah tơbleăng mâu tơmeăm pêi lo ing chiâk deăng, leh ôu drôu vang ƀă hía hé.

Roh kố kô ai tơdroăng mơđah tơbleăng, mơhno mâu tơmeăm pêi lo ing chiâk deăng djâ inâi ‘’Đà Lạt – ki lĕm ing tơnêi lĕm’’, reăng cho tơdroăng ki xiâm dế châ khu râ kăn pơkuâ kong pơlê, kuăn pơlê ƀă khu tê mơdró thâ hbrâ vâ ăm tơdroăng ki lăm ngăn dêi tơmối, ki má lối mâu reăng châ ‘măn a mâu kơpong tơdjuôm pơlê pơla, mâu troăng prôk ki xiâm ƀă rơtâ tá long têa Xuân Hương.