Klêi 1 khế xúa khu râ kăn pơkuâ 2 râ, kong pơlê Lâm Đồng ối má 4 lâp tơnêi têa ‘na chih kơxô̆ hâk vâ tơdroăng pro mơ-éa cheăng kâ ƀă tơnêi têa. Mơhé tơdroăng pêi cheăng xuân hlo ai hên mâu tơdroăng pá puât, tơvâ tơvân a râ cheăm. Ki má môi cho tơdroăng ôh tá tŭm mơngế pêi cheăng ki chiâng pêi trâu hơhngế vâ tơleăng tơdroăng cheăng. Lâp kong pơlê ai 93 cheăm, bêng ôh tá ai kăn ƀô̆ pêi ‘na kŏng ngê̆ thông tin; 60 cheăm, bêng ôh tá ai mơngế pêi cheăng ‘na loăng pơlái kong kế ƀă kong prâi; 33 cheăm, bêng ôh tá ai mơngế pơkuâ ‘na mơjiâng pro kế tơmeăm khoăng...

Sap ing lơ 1/8, Viƀan kong pơlê Lâm Đồng hiăng rah xo hên kŏng chưk, viên chưk vêh a mâu cheăm tŏng gum tơdroăng cheăng dêi khu pêi cheăng tơnêi têa.

Tung roh kố ai 260 kŏng chưk châ rah xo ăm pêi cheăng a râ cheăm. Rơtế ƀă mê, Kŏng an kong pơlê Lâm Đồng pơtroh 370 kăn ƀô̆ kŏng an ƀă khu lêng pơtroh 100 ngế lăm pêi cheăng a cheăm. Tiô tối hdrối mâu kŏng chưk, viên chưk kô châ ăm pêi cheăng a cheăm, pêi pro hnoăng cheăng tung pơla 3 khế, rế tơdrêng amê veăng tung kơvâ xing xoăng tơdroăng cheăng; rế hnê mơhno, hnê mơjiâng ăm kăn ƀô̆ râ cheăm.