Vi ƀan hnê ngăn kong pơlê Lâm Đồng dế mơ-eăm pêi pro klêi mâu hlá mơ-éa vâ pơxiâm bro 2 to troăng kân Tân Phú – Bảo Lộc ƀă Bảo Lộc – Liên Khương pơxiâm bro a hâi lơ 2/9 la ngiâ. Tung 2 tơdroăng tơkêa kố, troăng kân Tân Phú – Bảo Lộc ai ki xŏn dâng 66 km, tâi tâng kơlo liăn bro 17.200 rơtal liăn. Tơdjêp ƀă troăng kân kố cho troăng kân Bảo Lộc – Liên Khương, xŏn 74km, tâi tâng kơlo liăn ‘no tiô tối hdrối 19.521 rơtal liăn.

Tiô pôa Ngô Văn Ninh, Kăn pơkuâ Ƀơrô cheăng, ngế tơpui kâ ăm Vi ƀan hnê ngăn kong pơlê Lâm Đồng, 2 to troăng kân kố cho troăng prôk ki kal, tơdjêp ‘na tơdroăng tê mơdró dêi kong pơlê Lâm Đồng ƀă mâu kong pơlê peăng Hdroh. Drêng bro klêi ah kô cho ivá ki xiâm mơdêk cheăng kâ rêh ối pơlê pơla. Nôkố kong pơlê dế mơdêk rơdêi tơdroăng ki mơ-eăm pêi pro klêi mâu hồ sơ hlá mơ-éa, tơbleăng mâu tíu ki tâp tơneăn hdró, gu tơbăng mâu tơnêi tíu vâ rĕng bro 2 to troăng kân kố ƀă kô pơxiâm bro a rôh leh lơ 2/9 la ngiâ.