Ing hên hơnăm kố, ngoh K’Sáu, kăn thôn K’Rèn, cheăm Hiệp Thạnh, kong pơlê Lâm Đồng lăm hnê tối, pơtâng khĕn ‘na  Luât rah xo, tâ phĭu, pôk kăn xiâm, tung mê, ai hnê ‘na túa ki tơdjuôm, tơdâng, tơtro, lăm tâ phĭu ki pơkí; tơdrêng amê, hnê tối ‘na luât ki tơná mâu kăn mơhnŏng rah xo dêi tơná, túa ki po roh hôp vâ tăng rah mơngế, chêh xo inâi mâu kuăn pơlê lo lăm tâ phĭu. Tiô ngoh K’Sáu tối ăm ngin ‘nâi, tơdroăng ki rak vế, pêi pro tro tiô túa cheăng mê kô veăng gum rak tơniăn ăm hneăng tâ phĭu tơkŭm po a hâi lơ 15 khế 3 la ngiâ po tiô tuăn i hiâm mơno kuăn pơlê, tro tiô luât, tơniăn ƀă kuăn pơlê dêi thôn kô tăng rah mơngế ki tơxâng vâ pro kăn xiâm hnê ngăn:

“Ƀă ivá cheăng dêi tơná á tung hnoăng hnê tối ăm vâi krâ-nhŏng o ‘nâi nhên ‘na hneăng tâ phĭu, ‘na inâi mâu ngế ki châ rah xo ki tơxâng. Á hlo vâi krâ kuăn pơlê hơniâp ro drêng châ ‘nâi nhên mâu tơdroăng mê. Pơla hdrối kố nah, hôp kuăn pơlê tung thôn ai 2 ngế ai môi ngế kơnốu môi ngế kơdrâi ki tơxâng vâ pro kăn Hô̆i đong hnê ngăn cheăm a la ngiâ kố ah. Vâi krâ kuăn pơlê xuân hiăng vâ môi tuăn”.

A kong pơlê lâm Đồng, vâ mâu ngế ki tâ phĭu ƀă kuăn pơlê châ hlê plĕng nhên ‘na mâu tơdroăng ki kal tiô luât tâ phĭu, mê Khu râ pơkuâ hnê ngăn Đảng, Măt trâ̆n Tơnêi têa ƀă mâu khu râ ngăn ‘na cheăng kal kí, pơlê pơla hiăng hnê tối nhên, trâu rơdâ, rơhí rơhó, tŭm têk tiô Tơdroăng pơkâ kơxô̆ 46 mơ’no a hâi lơ 16/5/2025 dêi Khu xiâm ngăn ‘na cheăng Kal kí, Tơdroăng pơkâ kơxô̆ 02 mơ’no a hâi lơ 23/9/2025 dêi Khu pơkuâ hnê ngăn Đảng ‘na hnoăng pơkuâ tâ phĭu  rah xo kăn hnê ngăn Kuô̆i hô̆i hneăng 16 ƀă mâu kăn teăng mâ Hô̆i đong hnê ngăn rêm râ hneăng hơnăm 2026-2031. Ing mê, Măt trâ̆n Tơnêi têa, mâu khu râ, kơvâ cheăng kal kí-pơlê pơla tơrŭm cheăng ƀă mâu khu râ tơkŭm hnê tối ‘na mâu troăng hơlâ ki nếo dêi Luât pơkâ hnăm 2013 klêi kơ’nâi ‘mâi rơnêu, mơjiâng pro thăm, tơ’nôm mâu tơdroăng luât ƀă Luât pơkâ pro mơjiâng khu râ kăn a cheăm bêng, thôn pơlê (‘mâi rơnêu); Luât ‘mâi rơnêu, mơjiâng pro thăm mâu tơdroăng dêi Luât tâ phĭu rah xo kăn hnê ngăn Kuô̆k hô̆i ƀă mâu kăn teăng mâ Hô̆i đong; mâu hlá mơ-eá, tơdroăng pơkuâ ngăn, hnê tối dêi mâu kơ koan, khu râ, kơvâ cheăng dêi Hô̆i đong hnê ngăn ‘na tâ phĭu rah xo kăn dêi Tơnêi têa ƀă hên mâu hlá mơ-eá ki ê.

Pôa Mai Linh Sơn, Kăn hnê ngăn Vi ƀan Măt trâ̆n Tơnêi têa Việt Nam cheăm Dran, kong pơlê Lâm Đồng tối ăm ngin ‘nâi:

“Măt trâ̆n tơrŭm ƀă Vi ƀan, Bơrô Mơhno túa lĕm tro Tơdroăng kal nếo tơkŭm po tơdroăng hnê tối ƀă tơdroăng ki châ ngăn châ hlo. Ki má péa cho hnê tối ‘na tơdroăng ki tối pơtâng hnê khĕn ing mâu roh hôp vâ tơmâng mâu tơdroăng pói rơhêng vâ dêi kuăn pơlê ki rêh ối a pơlê vâ kuăn pơlê châ rak tơniăn dêi hnoăng ƀă tơdroăng pêi pro tiô pơkâ dêi Luât tâ phĭu pôk xo kăn. Rak vế tơniăn cho mơngế kuăn pơlê hlê plĕng nhên mâu tơdroăng ki ai tơdjâk troh hnoăng cheăng dêi kuăn pơlê ki veăng rak vế, pêi pro dêi hnoăng cheăng mơjiâng khu kăn hnê ngăn. Pro ti lâi vâ mâu kăn Hô̆i đong hnê ngăn athế tơxâng cho mâu ngế ki rơkê khât teăng mâ, pôu râng tuăn mơno ƀă ihiâm mơno pói  vâ dêi Kuăn pơlê”.

Pôa Trần Hùng Dũng, Kăn hnê ngăn Vi ƀan cheăm Đơn Dương, kong pơlê Lâm Đồng tối ăm ngin ‘nâi:

“Ing tơdroăng ki tối pơtâng ing loa rơ’jíu klêi mê a Hlá mơ-éa tối tơbleăng dêi điê̆n tưh ƀă mâu kơvâ cheăng hiăng hnê mơnhôk trâu rơdâ troh hên khu râ, kơvâ cheăng ƀă Kuăn pơlê a thôn pơlê kố. Ing mê, vâi krâ kuăn pơlê xuân hiăng hlê plĕng nhên hnoăng cheăng, pôu râng tơdroăng, ki kal dêi hneăng tâ phĭu mê cho veăng pêi pro mâu hnoăng cheăng ki vâ veăng gum ăm tơdroăng tơkŭm tâ phĭu rah xo kăn Kuô̆k hô̆i ƀă Hô̆i đong hnê ngăn rêm râ tung la ngiâ kô châ po mơjiâng tơniăn lĕm”.

Vâ hâi tâ phĭu rah xo kăn Kuô̆k hô̆i ƀă mâu kăn teăng mâ Hô̆i đong hnê ngăn rêm râ a hâi lơ 15 khế 3 la ngiâ châ tơniăn lĕm, tro tiô hiâm mơno kuăn pơlê pói rơhêng vâ, păng ‘nâng cho roh ki trâm mâ, pêi hnoăng cheăng kal kí ki trâu rơdâ, mê cho “hâi phiu ro lâp tơnêi têa”. Klêi kơ’nâi roh hôp môi tuăn roh má pái pơla hdrối kố nah, hnoăng cheăng hnê tối ‘na tơdroăng cheăng kal kí ki kal kố dêi tơnêi têa, kong pơlê Lâm Đồng hiăng thăm mơdêk hên tâ nếo tơdroăng ki tơrŭm môi i hiâm mơno, vâ môi tuăn tung Kuăn pơlê.

Tơdrêng ƀă tơdroăng hnê tối troh tơrêm rơpŏng hngêi dêi mâu ngế tâ phĭu ƀă kuăn pơlê, 124 to cheăm, bêng, ki rơhêng vâ tối dêi kong pơlê hiăng pơkrâ châ lối 2.600 paneau hnê tối ‘na hneăng tâ phĭu rah xo kăn; chúa hlá cơ lối 3.000 hlá cơ ché, hlá cơ khêi; mâu túa ki mơ’no tung loa ki mơ’no rêm hâi tiô rêm khế ‘na mâu tơdroăng ‘na Luât tâ phĭu rah xo, hnoăng cheăng ƀă pôu râng tơdroăng cheăng dêi kuăn pơlê. A mâu troăng prôk ki xiâm, tơnêi tíu ki ối tung tíu tơdjuôm a bêng Xuân Hương-Đà Lạt, Bắc Gia Nghiã, Phan Thiết, Hàm Thắng ƀă hên mâu tíu ki ê, ing mê, mơjiâng chiâng tíu ki vâ hnê tối tơkŭm ‘na tâ phĭu rah xo kăn mơjiâng chiâng tơdroăng ki hơniâp ro, phiu niu ƀă veăng gum mơdêk tuăn mơno ki hloh hlê rơkê plĕng, ki pơxúa kân khât, hnoăng, pôu râng tơdroăng cheăng dêi kuăn pơlê.

Jâ Phạm Thị Phúc, Phŏ kăn pơkuâ hnê ngăn Đảng, Kăn hnê ngăn Vi ƀan Măt trâ̆n Tơnêi têa Việt Nam kong pơlê Lâm Đồng tối ăm ngin ‘nâi, a mâu cheăm kơpong hơngế hơngo, tíu ki ai kơdrâm kuăn pơlê tiô khôp ƀă kuăn pơlê dêi mâu hdrông kuăn ngo ki iâ mơngế rêh ối, vâ tơdroăng cheăng hnê tối ‘na tâ phĭu rah xo kăn châ tơtro tơniăn păng ‘nâng, Măt trâ̆n hiăng pơtối mơdêk hnoăng cheăng dêi vâ chê 900 ngế ki châ kuăn pơlê loi tơngah, mâu khu râ, kơvâ cheăng, hnoăng cheăng dêi tơdroăng loi tĭng tiô khôp tung hnoăng rơtế prôk ƀă khu râ kăn pơkuâ ngăn thôn pơlê:

“Măt trâ̆n pôu râng hnoăng cheăng ki xiâm tung tơrŭm ƀă mâu khu râ, kơvâ cheăng, mâu kơ koan pơkuâ ngăn tung hnê mơhnhôk, hnê hriâm pơtroh tơdroăng ki nếo vâ pêi pro tiô troăng hơlâ ăm mâu ngế ki châ kuăn pơlê loi tơngah, mâu bok, yah chĭng ki pêi cheăng a mâu pơlê cheăm ki kơdrâm kuăn pơlê tiô khôp, mâu pơlê cheăm dêi hdrông kuăn ngo vâ rơtế tơrŭm tung hnoăng cheăng hnê mơhnhôk rak vế, pêi pro. Mơ mơnêi trâm mâ, hôp, tơpui tơno mâu tơdroăng nếo ai, hnê pơtâp, mơhriâm vâ pơtối rak vế mâu luât pơkâ ki nếo. Ƀă mâu ƀok xối, yah chĭng, mâu yao phu, mâu ki cheăng tung hngêi khôp pơrá châ hnê tối, pơtâng khĕn mâu tơdroăng tơrŭm ki lĕm tro, tơrŭm ƀă ai tơdroăng ki tơrŭm krá tơniăn, rơtế pêi pro mâu hnoăng cheăng dêi pơlê cheăm. Rơtế ƀă mâu cheăm bêng tung hnê tối, mơhnhôk mâu khu râ, kơvâ cheăng tung hnê tối, pơtâng khĕn”.

Ing hnoăng cheăng ki mot pêi tơdroăng cheăng, tơdrăng lĕm khât, kơhnâ krâu khât dêi khu râ, kơvâ cheăng kal kí; tơdroăng ki hbrâ rơnáu, ki rơkê plĕng tung hnoăng cheăng hnê tối; rơtế ƀă i hiâm mơno, pôu râng dêi tơdroăng cheăng, vâ môi i hiâm mơno, hloh hlê rơkê plĕng tung hnoăng cheăng hnê mơhnhôk, tối pơtâng; tơdrêng ƀă hnoăng pôu râng dêi hnoăng cheăng, vâ môi tuăn pơla mâu kăn ƀô̆, đảng viên ƀă mâu khu râ, kơvâ cheăng, mâu Kuăn pơlê, kong pơlê Lâm Đồng dế hbrâ rơnáu ăm hâi ki leh kân mê dêi tâi tâng kuăn pơlê a hâi lơ 15 khế 3.

Ing pơlê cheăm ối kơpong hơngế, hơngo troh a mâu kơphô̆, mâu pơlê kong kân, tơdroăng ki vâ pêi pro troh a hâi tâ phĭu rah xo kăn xiâm Kuô̆k hô̆i hneăng 16 ƀă mâu kăn teăng mâ Hô̆i đong hnê ngăn rêm râ hneăng hơnăm 2026-2031 a kong pơlê Lâm Đồng hiăng châ po rơdâ, lân chhâk hơngế, ó rơdêi.