VOV4.Xơ Đăng - Peăng xêi lơ 7/10, Khu ngăn ‘na tơdroăng nếo ai ƀă tơbleăng mơhno dêi kong pơlê Lâm Đồng hiăng tơkŭm hơ’lêh kơxô̆ ‘na môi tơdroăng rêh ối tơniăn, hơniâp ro tâ. Hneăng hôp hiăng mơdoh hên chôu phut tơpui tơno, tối tơbleăng ‘na tơdroăng ki kal xiâm, ki tơƀrê ƀă ai pơxúa dêi tơdroăng hơ’lêh kơxô̆ ki pơtroh ăm. Tung mê, tơkŭm mơnhên leăng tơdroăng hơ’lêh kơxô̆ tung hnoăng cheăng rak ngăn liăn ngân tơnêi têa; hnoăng cheăng rak vế tơniăn tơdroăng nếo, séa mơnhên ngăn ƀă ‘mâi rơnêu mâu tơdroăng ki ôh tá tơniăn ‘na ki pơkí, kơtôa tung pơla hơ’lêh kơxô̆; tâi tâng dêi hnoăng cheăng hơ’lêh kơxô̆ ƀă hên mâu tơdroăng ki ê.

Lâm Đồng tơkŭm po hneăng hôp na hơ’lêh kơxô̆

Dế nôkố, tâi tâng mâu cheăm, bêng, pơlê kân dêi kong pơlê Lâm Đồng hiăng mơjiâng tôh kŏng ngê̆ kơxô̆ pơlê pơla, ƀă tâi tâng tâng kơxô̆ mơngế ki veăng pêi pro lối 4 rơpâu ngế, 96% kơpong pơlê hiăng châ pơtroh hyôh Internet ƀă kơxái ki kân krá, ai măng lâp lu. mâu kơ koan Đảng ƀă khu kăn pơkuâ hiăng hbrâ rôe ‘măn kơmăi vi tĭnh vâ tơdjêp hyôh Internet tiô kơ troăng ki rơdêi tâng vâ tối tơtro ƀă tơdroăng vâ pêi pro dêi tơdroăng kơxô̆.

VOV Tây Nguyên/Tơplôu: Nhat Lisa