Vâ tơniăn hneăng tơ’noăng mơgêi hriâm râ má pái phôh thong hơnăm kố châ po tơniăn, kơtăng ƀă tro tiô pơkâ, Khu ngăn hnê hriâm ƀă hnê mơjiâng tuăn ngôa rơkê Lâm Đồng dế tơbleăng pêi tơdroăng cheăng hbrâ mâu tơmeăm ƀă mơngế. Klêi chêh inâi vâ tơ’noăng chêh tiô troăng măng intơrnet, kong pơlê Lâm Đồng ai vâ chê 14 rơpâu 900 ngế hok tro chêh inâi tơ’noăng rôh má pái phôh thong hơnăm 2023, tâk 740 ngế hok tro chêh inâi tơ’noăng tâng vâ pơchông ƀă hơnăm nah.

Tiô pôa Huỳnh Quang Long, Kăn phŏ pơkuâ hnê hriâm ƀă hnê mơjiâng tuăn ngôa rơkê Lâm Đồng, tối kô mơhno tơ’noăng ai 627 to veăng tơ’noăng a 39 tơring, pơlê kong kơdrâm tung kong pơlê. Tơdrêng ƀă tơniăn ‘na hngêi trung tơ’noăng, Khu xiâm ngăn hnê hriâm ƀă hnê mơjiâng tuăn ngôa rơkê Lâm Đồng xuân tơniăn ‘na mơngế, tơbleăng hriâm luât pơkâ tơ’noăng ăm tâi tâng mâu kăn ƀô̆ thái cô ki veăng ngăn tơ’noăng.