VOV4.XơĐăng - Tiô pơkâ thế dêi Khu xiâm Rak vế Hơniâp lĕm, Khu xiâm pơkuâ ngăn lêng, Khu kăn Việt Nam a Khu lâp kong têa hiăng tơkŭm po kân krip leh diâp kơlŏng Thươ̆ng tă ăm pôa Lương Trường Vinh ƀă kơlŏng Trung tă ăm pôa Nguyễn Phúc Đông, dế pêi cheăng a Khu xiâm tơdroăng cheăng Hơniâp lĕm, Khu lâp kong têa. Tơpui a rôh leh, kăn teăng mâ pôa Đặng Hoàng Giang mơnhên tối khât ivá mơ-eăm ƀă pêi klêi rơkê mâu hnoăng cheăng châ pơcháu dêi mâu vâi pú châ krâ kơlŏng hơnăm 2022.

Kăn teăng mâ Đặng Hoàng Giang pơkâ thế ƀă hnoăng cheăng pơkuâ ki nếo, mâu vâi pú kal pơtối mơdêk ivá dêi tơná tung hnoăng cheăng ƀă tí tăng ‘nâi plĕng tro ăm Đảng, Tơnêi têa ‘na mâu kơvâ cheăng tơrŭm rak vế hơniâp lĕm pơla Việt Nam ƀă Khu lâp kong têa, malối cho tăng rôh tơ’lêi hlâu mơdêk veăng dêi khu lêng rak vế hơniâp lĕm Việt Nam a mâu Khu dêi Khu lâp kong têa.

Katarina Nga tơplôu ƀă tơbleăng