VOV4.Xơ Đăng - Kong măng lơ 6/9 a tíu xiâm pơtui pơchuât Rơ’jiu Tơnêi têa 58 Quán Sứ, Hà Nội po Leh diâp pri Tiếng nói Việt Nam 2022 hơnăm 2022. Kố cho tơdroăng Tơbâ 77 hơnăm hâi mơjiâng Rơ’jiu Việt Nam (7/9/1945 – 7/9/2022). Pơxiâm po Leh diâp pri Tiếng nói Việt Nam, pôa Đỗ Tiến Sỹ, kăn pơkuâ Rơ’jiu Việt Nam tối nhên ing mâu hneăng mơnhông ƀă mơdêk dêi tơnêi têa, Tiếng nói Việt Nam đi đo ối pakĭng kuăn pơlê, hơtôu ƀă loi tơngah.

Leh diâp pri Tiếng nói Việt Nam 2022

Rế hía rế xơpá, rơ-iêo, rế mơhno tối ivá khên tơnôu, hnoăng pôu râng dêi tơdroăng cheăng dêi ngế pêi cheăng ‘na hlá tơbeăng Rơ’jíu xiâm Việt Nam. Kăn xiâm pơkuâ Rơ’jiu Việt Nam tối nhên: Tung hneăng ki hơ’lêh kơxô̆. Rơ’jiu Việt Nam rế athế hơ’lêh hên tâ nếo mơdêk ki pơxúa dêi tơná, kal ai mâu tơdroăng tơchĕng tơmiât rơkê cho ƀâng ki loi tơngah rĕng, teăm tơdrêng, ôh tá la lâi chiâng tâi.

Klêi kơ’nâi 1 hơnăm tơbleăng ƀă châ̆m ƀai tơ’noăng, Khu tơkŭm po hiăng rah xo ƀă diâp Pri tơ’noăng Tiếng nói Việt Nam năm 2022 mê cho 5 pri A, 9 pri B ƀă 11 pri C ăm mâu ƀai ki châ̆m pri. Tung mê mâu ƀai “Tùy tiện phá rừng quốc gia làm đường Trường Sơn Đông” dêi Kơ koan Rơ’jiu Việt Nam kơpong Tây Nguyên xuân châ diâp pri A ăm hlá tơbeăng pơchuât tung rơ’jíu.

Katarina Nga tơplôu ƀă tơbleăng