Kơhâi dế lơ 15/6, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng a leh kĭ tơdroăng pơkâ tơrŭm cheăng pơla ngế chêh tôm xo rơkong Kuô̆k hô̆i, Kăn pơkuâ Kuô̆k hô̆i ƀă Khu pơkuâ mâu kơ koan dêi Kuô̆k hô̆i, ngế xiâm pơkuâ mâu kơ koan ối tung Vi ƀan pơkuâ Kuô̆k hô̆i.

Leh kĭ pơkâ kố cho vâ pêi pro Tơdroăng dêi Đảng đoàn Kuô̆k hô̆i ‘na pêi pro Pơkâ Hneăng hôp tâi tâng rôh má 13 dêi Đảng ƀă mơdêk hnoăng cheăng pơkuâ, hnê mơhno, rak vế tơdroăng tơrŭm krá tơniăn, tơƀrê, môi tuăn, teăm tơdrêng ƀă mơdêk hnoăng cheăng tung tơrŭm pơla ngế xiâm chêh tôm xo rơkong Kuô̆k hô̆i, Kăn pơkuâ Ƀơrô cheăng Kuô̆k hô̆i ƀă khu pơkuâ Hô̆i đong Hdroâng kuăn ngo, khu pơkuâ Vi ƀan dêi Kuô̆k hô̆i, Khu pơkuâ kơ koan ối tung Vi ƀan hdroâng kuăn ngo, Khu pơkuâ Vi ƀan dêi Kuô̆k hô̆i, Ngế xiâm pơkuâ kơ koan ối tung Vi ƀan pơkuâ Kuô̆k hô̆i.

Pakĭng mê, mơdêk hnoăng cheăng tung tơrŭm, kum ăm rêm kơ koan pêi klêi hnoăng cheăng, hnoăng pơkuâ tiô pơkâ, veăng kum mơdêk tâ nếo ki rơkê plĕng, tơƀrê tơdroăng cheăng dêi rêm tíu pêi cheăng, tơdrêng amê hlối mơnhên hnoăng cheăng pôu râng pơla rêm pâ vâ rak vế pơkâ tơleăng hnoăng cheăng tiô túa kơhnâ, hbrâ, tơƀrê.