VOV4.Xơ Đăng - Peăng xêi lơ 23/9, a Hngêi Kuô̆k hô̆i hiăng po Leh koh tơbâ 30 hơnăm hâi mơjiâng Vi ƀan ngăn ‘na kring vế ƀă gak ngăn dêi Kuô̆k hô̆i hnối tơdah xo Me dai Pêi cheăng ối má Môi. Veăng leh koh tơbâ mê ai Kăn xiâm hnê ngăn tơnêi têa, Kăn xiâm Hnê ngăn Hô̆i đong Kring vế ƀă Gak ngăn, cho pôa Nguyễn Xuân Phúc; pôa Vương Đình Huệ, Kăn xiâm hnê ngăn Kuô̆k hô̆i.

Tung plâ 30 hơnăm hiăng luâ hdrối mê hía nah, Vi ƀan pơkuâ ngăn Kring vế ƀă Gak ngăn hiăng pêi pêi pro hên hnoăng cheăng ‘mâi rơnêu, mơjiâng bro tơ’nôm mâu tơdroăng ai tơdjâk troh Luât hơnăm 1992, mơjiâng tơkêa bro ‘na Luât hơnăm 2013, maluâ cho mâu troăng pơkâ Kring vế Tơnêi têa, mơjiâng khu lêng kring vế, gak ngăn, Hô̆i đong Kring vế ƀă Gak ngăn; pêi pro mâu hnoăng cheăng tung kơvâ séa ngăn, mâu rơkong tơpui tối, pơkâ thế dêi Vi ƀan pơkuâ ngăn ki séa mơnhên mâu tơdroăng cheăng ki kơnía, dâi lĕm tro khât, ki tơ’lêi chiâng pêi pro tơtro ƀă hnoăng cheăng ki ai khât, kum ăm Chin phuh, mâu kơ koan ki ai tơdjâk rĕng teăm ‘mâi rơnêu, ‘mâi bro, tah lôi mâu tơdroăng ki tá teăm tơtro tung rak vế, pêi pro ‘na mơjiâng troăng hơlâ luât, veăng kum pro hơ’lêh ki ai pơxúa khât tung kơvâ cheăng séa mơnhên ngăn.

Leh koh tơbâ 30 hơnăm hâi mơjiâng Vi ƀan kring vế ƀă Gak ngăn dêi Kuô̆k hô̆i

Pôa Vương Đình Huệ hiăng pơkâ thế, tung la ngiâ kố ah, Vi ƀan pơkuâ ngăn Kring vế ƀă Gak ngăn pơtối hbrâ rơnáu pêi pro vâ tối tơbleăng hdrối mâu tơdroăng, mơdêk hnoăng cheăng ki séa ngăn, lăm ngăn, veăng tơpui tối, hnê khĕn, pâ thế mâu tơdroăng cheăng ki ton xŏn la ngiâ ‘na kring vế, gak ngăn, maluâ cho pơkâ mơ’no mâu hiâm tuăn ki hơ’lêh nếo, tuăn tơmiât nếo ‘na kring vế gak ngăn Tơnêi têa xiâm pâ pôa, nôu pâ tơná.

Nhat Lisa tơplôu ƀă tơbleăng