Pơtối tơdroăng ki lăm pôu Việt Nam, kơmăng lơ 1/11, kuăn pơtáu ki pơtó Đan Mạch cho pôa Frederik prếi kơdrâi pôa cho Mary Elizabeth hiăng veăng a Leh tơbâ 50 hơnăm mơjiâng tơrŭm cheăng tơpui kâ Việt Nam – Đan Mạch. Rơtế veăng hôp a rôh leh ai jâ Võ Thị Ánh Xuân, kăn xiâm phŏ hnê ngăn tơnêi têa rơtế ƀă kăn teăng mâ mâu Khu xiâm, kơvâ cheăng, kong pơlê ƀă khu mơdró kâ dei péa pâ.

Tơpui a rôh Leh tơbâ, jâ Võ Thị Ánh Xuân tối nhên, Việt Nam ƀă Đan Mạch hiăng mơjiâng tơrŭm cheăng tơpui kâ a hơnăm 1971, pơkâ mâu tơdroăng kal apoăng tung tơbêng tơdroăng tơrŭm cheăng tơpui kâ pơla péa tơnêi têa. Sap ing mê, Đan Mạch cho môi tung mâu khu ki tŏng kum pơla péa pâ ki kal má môi dêi Việt Nam, veăng kum kơhnâ tung mơnhông mơdêk cheăng kâ rêh ối pơlê pơla ƀlêi chiâng dêi Việt Nam nôkố.

Jâ Võ Thị Ánh Xuân, Kăn xiâm phŏ hnê ngăn tơnêi têa tơpui a rôh leh tơbâ

Tơkâ luâ tơdế chal mơnhông, tơrŭm cheăng péa tơnêi têa hiăng hơ’lêh sap ing tơrŭm cheăng mơnhông tiô khôi hmâ chiâng tơrŭm cheăng tơdâng tơ’mô, rơtế ai pơxúa ƀă hiăng mơjiâng tơrŭm cheăng tung tâi tâng a hơnăm 2013. Tiô kuăn pơtáu, Đan Mạch dế cho kong têa tê mơdró, ‘no liăn cheăng ki kal dêi Việt Nam ƀă kô pơtối rơtế prôk tiô túa ki tơƀrê, loi tơngah ƀă Việt Nam tung mâu kơvâ cheăng tơrŭm ‘na kong prâi, pêi chiâk deăng, khăm pơlât ƀă hnê hriâm.