VOV4.Xơ Đăng - Kơxo lơ 12/10 la ngiâ, a Hà Nội kô po leh tơbâ Hâi mâu khu mơdró Việt Nam  lơ 13/10 ƀă ô eăng “khu mơdró kâ rơkê’’ hơnăm 2022. Kố cho tơdroăng châ tối tơbleăng a rôh hôp ƀă khu chêh hlá tơbeăng kơxo lơ 6/10 dêi Khu tơrŭm ngăn tê mơdró ƀă Kơmăi kơmok Việt Nam pơxá (VCCI). A rôh hôp, kăn hnê ngăn VCCI Phạm Tấn Công tơbleăng tơdroăng cheăng pêi ai pơxúa khât vâ khoh tơbâ troh hâi Khu mơdró Việt Nam lơ 13/10 hơnăm kố.

Tung mê, ki tơxâng vâ tối ai 2 tơdroăng cheăng pêi cho Hôp tơpui tơno khoa hok ‘’Tuăn mơno khu mơdró ƀă mơhno túa lĕm tro tê mơdró Việt Nam tung pơla nôkố’’ ƀă leh tơbâ Hâi khu mơdró Việt Nam ƀă ô eăng “Khu mơdró Việt Nam kơhnâ rơkê’’ hơnăm 2022. Khu tơkŭm po a rôh  tối tơbleăng xuân ăm ‘nâi ‘na ‘’tơdroăng pơtih’’ nếo dêi Khu mơdró Việt Nam ki rơkê mê.

Kăn xiâm hnê ngăn tê mơdró ƀă Kơmăi kơmok Việt Nam Phạm Tấn Công pơkuâ hneăng hôp tối tơbleăng

Ing mê, pơtih ai 6 túa cheăng rơkê ăm 6 tơdroăng pơkâ ‘na tuăn mơno lĕm mâu ki mơdró Việt Nam xua VCCI tơbleăng: pro xiâm ki pơxúa cheăng kâ rêh ối pơlê pơla; Pêi pro tiô Luât pơkâ; tơdrăng, tơdâng tơ’mô, tro tơdroăng; ‘nâi hriăn plĕng ki nếo, tơrŭm, rơtế mơnhông tơtêk; nhoăm kong kế, rak vế hyôh kong prâi, pâ tơnêi têa, ai hnoăng cheăng ƀă pơlê pơla ƀă rơpŏng hngêi.

VOV/Tơplôu: A Sa Ly