VOV4.Xơ Đăng - Hâi lơ 19/8, a Hà Nội, Khu xiâm ngăn chiâk deăng ƀă Mơnhông thôn pơlê tơrŭm ƀă Khu xiâm pơtâng tối tơdroăng kal tiô troăng um tơvi, rơ’jiu internet tơkŭm po leh tơbleăng “Hơ’lêh kơxô̆ Pêi chiâk deăng ƀă Mơnhông thôn pơlê” ƀă tơbleăng Troăng tơbleăng tơdroăng kal ƀă tíu ‘măn rak hlá mơ-éa, rak ngăn mah kơxô̆ kơpong pêt mơjiâng tơmeăm. Tiô riân, lâp tơnêi têa nôkố ai 4,8 rơtuh ha ƀăng tơnêi pêt hdrê loăng, mê cho: loăng plâi kâ, pêt báu ƀă pêt loăng ton hơnăm.

Tung mê, hên kơpong hiăng châ hbru ăm mah kơxô̆ pơkâ inâi vâ séa ngăn tơdroăng ki pêt, mơjiâng, tí tăng xiâm rêi, mơdêk ki dâi lĕm dêi kế tơmeăm pêi lo ing chiâk deăng môi tiah phái a kơpong tơbăng kroăng Cửu Long; kơphế, krui kơxái a kơpong Tây Nguyên; plâi rơgá a Bình Thuận; plâi rơkuâ chí, plâi treăng kêt dro a mau kong pơlê Hải Dương, Bắc Giang, Hưng Yên, Sơn La ƀă hên kong pơlê ki ê.

Laga, tâng vâ ngăn, túa ki pêt xuân ối pêt iâ êt tá hâi tơdjêp tŭm tơdroăng kal pơla pêt ƀă kơchơ mơdró. Ki khât kố pâ thế athế mơdêk rĕng tơdroăng ki hơ’lêh kơxô̆ tung kơvâ pêt vâ mơdêk tơƀrê pơla pêt, kơchơ mơdró ƀă ngế ki roê.

Katarina Nga tơplôu ƀă tơbleăng