Kơxo lơ 28/6, lối 14 rơpâu ngế hok tro kong pơlê Gia Lai mot tung rôh tơ’noăng môn ki apoăng dêi hneăng tơ’noăng râ má pái phôh thong 2023, môn Ngữ văn. Rôh tơ’noăng ki apoăng hlo tơniăn lĕm, kơtăng, ôh tá ai hok tro ki lâi pro xôi tơdroăng tơ’noăng. Ki hên mâu hok tro tơ’noăng châ mơnhên tối, ‘na ko ƀai tơ’noăng xuân môi tiah mâu hơnăm hdrối mê hía nah ƀă môi tiah mâu ko ƀai tơ’noăng ki tơ’noăng mơnúa ngăn hdrối ki hok tro hiăng châ bro tung pơla pơla hdrối nah.

Mâu hok tro tối hâk ro drêng môn Ngữ văn tối ‘na tơdroăng “bro tơdâng ‘na ki tơniăn”. Kố ôh ti xê cho tơdroăng ki kal ai pơkâ thế tơdroăng kal mê ối tơtro ƀă hơnăm dêi mâu vâi o, sap ing mê kum hok tro ai mâu tơdroăng ki mơnhên tối, tơmiât phá dêi rơpó. Tiô tối tơbleăng rĕng dêi Khu ngăn hnê hriâm ƀă hnê mơjiâng tuăn ngoâ rơkê Gia Lai, tung rôh ki apoăng dêi hneăng tơ’noăng râ má pái phôh thong hơnăm 2023, a môn Ngữ văn, lâp kong pơlê ôh tá ai mâ 54 ngế hok.

Ki nhên, kơxô̆ hok tro chêh inâi tơ’noăn môn Ngữ văn ai 14.696 ngế; kơxô̆ hok tro tơ’noăng ai 14.642 ngế, ôh tá ai mâ 54 ngế, tung mê ai 18 ngế hok tro hdroâng kuăn ngo.