Riân troh hâi lơ 30/4/2023, Khu tơkŭm po tơ’noăng kâ pri tung lâp tơnêi têa ‘na Kuô̆k hô̆i ƀă Hô̆i đong hnê ngăn kuăn pơlê (Pri Diên hồng) hiăng châ xo lối 3 rơpâu ƀai tơ’noăng. Tiô pơkâ, Leh mơhá pri Diên Hồng kô tơkŭm po a hâi lơ 9/6 a Tíu mơhno túa lĕm tro Việt - Xô. Kố cho tơdroăng nếo ai ki tơxâng vâ ‘nâi a  Rôh hôp má môi dêi Hô̆i đong châm điêm Pri Diên hồng châ tơkŭm po a mơ’nui kơxêi kố a hngêi Kuô̆k hô̆i. 

Kố cho pro mơhá chêh hlá tơbeăng ki kân chêh ‘na tơdroăng Kơ koan, kuăn pơlê rah xo, ai pơxúa phá kal khât ƀă ai hên ngế rơhêng vâ ‘nâi dêi mâu kăn Kuô̆k hô̆i. Pri tơ’noăng hiăng tơ’mot hên ngế veăng tơ’noăng dêi mâu kơ koan  chêh hlá tơbeăng, mâu ngế chêh hlá tơbeăng.

Riân sap mơhnhôk troh tâi hâi lơ 30/4, Khu tơkŭm po tơ’noăng hiăng xo lối 3.000 ƀai tơ’noăng. Mâu ƀai chêh hiăng teăm khâ tiô khu, klâ xoăng tiô túa vâ châm. Ƀă mâu ngế ki chêh, mâu ƀai chêh châ kâ pri,  Ƀơrô Kuô̆k hô̆i kô mơhá ăm liăn, Hlá mơ-éa mơnhên châ  kâ Pri hlối ai tá kế ki pro tiah um pơto pơtih pri mơhá; mơhá ăm liăn ƀă ƀâng kơdeăn khĕn ƀă mâu kơ koan chêh hlá tơbeăng ki châ kâ pri.