Tiô Tơbleăng, tâi tâng mơngế lăm tâ phĭu dêi lâp tơnêi têa tung inâi tâ phĭu hâi hnah cho: 76 rơtuh 516 rơpâu 637 ngế; tung mê kơxô̆ mơngế lăm tâ phĭu hiăng veăng lăm tâ phĭu cho: 76 rơtuh 043 rơpâu 527 ngế (châ kơlo têk chu 99,38%). Kong pơlê Lào Cai cho kong pơlê rĕng klêi hdrối má môi, rơtế ƀă pơlê kong kơdrâm Huế cho 2/34 kong pơlê châ kơlo têk chu 100% mơngế ki lăm tâ phĭu. Ki rơhêng vâ tối, kong pơlê Lào Cai ai 173 ngế lăm tâ phĭu sap ing 100 hơnăm tơngi klêng.

Tơdroăng tâ phĭu, mâu kơ koan chêh hlá tơbeăng tung tơnêi têa ƀă lâp plâi tơnêi đi đo tiô ngăn ƀă chêh tơdroăng roh tâ phĭu a mâu kong pơlê, pơlê kong kơdrâm, mâu kơpong tâ phĭu. Tơtrŏng chêh tơdroăng pêi pro hnoăng tâ phĭu dêi mâu kăn pơkuâ Đảng, Tơnêi têa, khu lêng, mơngế tâ phĭu hơnăm hiăng krâ, mơngế tâ phĭu hơnăm ối nếo roh apoăng pêi pro hnoăng tâ phĭu, kuăn pơlê hdroâng kuăn ngo, ƀok xối, yah chĭng, ƀok phop, mơngế tâ phĭu a kơpong tơkăng kong, rơlố, kơpong kong ngo, mâu tíu ki pá puât…

Ing mê ăm hlo, roh tâ phĭu châ tơkŭm po kuăn pơlê pơkuâ dêi hnoăng cheăng, tơtro lĕm tro hdrối kơ’nâi, mâu tơdroăng tiô pơkâ luât; hlê plĕng pôu râng hnoăng cheăng pơcháu ƀă tơdroăng hâk ro tung Hâi tơkŭm phiu ro tâi tâng kuăn pơlê.