Kheăn kơdeăn tơdroăng ‘mâi rơnêu luât rôh kố, pôa Trần Thanh Mẫn, Kăn xiâm hnê ngăn Kuô̆k hô̆i tối nhên tơdroăng ki xiâm nôkố cho pơhlêh nếo troăng pơkuâ rak tơniăn kế kâ ing tơprâ tơprŭng chiâng nhên xiâm kối. Kăn xiâm hnê ngăn Kuô̆k hô̆i pơkâ thế mơnhên inhên tíu xiâm pôu râng hnoăng cheăng má mơ’nui. Pôa xuân pơkâ mơnhên inhên khu ki lâi Tơnêi séa ngăn apoăng, khu ki lâi khu tê mơdró chiu pôu râng hnoăng cheăng, khu ki lâi tơkŭm séa ngăn kơ’nâi.

Kăn xiâm hnê ngăn Kuô̆k hô̆i tối, kal pơkâ inhên túa pơkâ xing xoăng khu ki tơ’lêi tung Luât lơ pơcháu Chin phuh tơbleăng tiô inâi vâ ví pêi hmâng vâ. Kăn xiâm hnê ngăn Kuô̆k hô̆i tối nhên, Luât rak tơniăn krúa lĕm kế kâ (‘mâi rơnêu) drêng tơbleăng thế tiâ châ 3 tơdroăng. Môi cho, tơmeăm troh kŏng kuăn pơlê hôm ai tơniăn lơ ôh? Péa cho, khu tê mơdró pêi tiô lĕm ai ki vâ iâ pro mơ-éa lơ ôh? Pái cho, drêng ai tơdroăng ki ôh tá tơniăn ti tăng xiâm kối, mơnhên châ hnoăng cheăng ƀă tơpui ƀă pêi pro rĕng lơ ôh?

Tơdrêng amê pôa pơkâ thế mâu kơ koan mơnhên inhên vâ kêi đeăng, djâ tung tơpui tơno a hôp tơno tơdroăng kal kăn teăng mâ Kuô̆k hô̆i pơkuâ ƀă tơmiât la ngiâ tơbleăng ăm pêi pro a Hneăng hôp má 3 dêi Kuô̆k hô̆i.