Pôa Lê Hữu Trí (kăn Kuô̆k hô̆i kong pơlê Khánh Hòa) tối tiah kố, mâu tơdroăng dêi kơxop hlá mơ-éa luât ing tơdroăng ki ai khât pơla nôkố xuân ối tơvâ tơvân. Kăn Kuô̆k hô̆i pơkâ thế 'mot tơ'nôm tơdroăng pơkâ tơpui tối hdrối lơ pơkâ tơdroăng ki nhên vâ mơnhên tơdroăng ki pro xôi (mơhnŏng pro lơ ôh tá mơhnŏng pro) ƀă ki rơ-iô dêi tơdroăng pro xôi a troăng 2, rơtế ƀă tơdroăng ki mơnhên tơdroăng ki kơdroh pro xôi a troăng 9 vâ xúa tơdâng tơ'mô.

‘Na pơkâ pơxâu phâk ƀă troăng rơnêu kế tơmeăm khoăng klêi kơ’nâi pro xôi, hên kăn teăng pơkâ pơkâ thế tá hâi tâk rơtế tâng tá hâi ai mơnhên tơdjâk tiô kơvâ ƀă khu ki chiu tơdjâk. Mê thế kơjo xúa ki păng 'nâng troăng hơlâ 'mâi mơnhông tơdroăng ki apoăng, tah lôi tơmeăm khoăng ki ôh tá tro, 'mâi rơnêu tíu ki pro ‘mêi kong prâi, nâp ăm tơnêi têa liăn ki ôh tá tro; tơdrêng amê mơnhên drêng lâi kal xo hlá mơ-éa phêp lơ ăm pơtê tơdroăng cheăng.  ‘Na hâi khế pơkâ tơleăng tơdroăng pro xôi, jâ Mai Phương Hoa (kăn dêi Ninh Bình) pơkâ thế mâu tơdroăng ki lâi tiô tối hdrối ton hâi khế pơkâ pơxâu phâk troh 3 hơnăm mê kal hriăn ngăn nhên, tơtro ƀă tơdroăng ki ai khât, ví pro ton hâi khế ôh tá kal. Tơdjâk troh kơlo pơxâu phâk liăn, tơdroăng tơkêa bro Luât pơxâu phâk liăn pơkâ kơlo pơxâu phâk ki hên tung pơxâu phâk liăn cho 1,5 rơtal liăn ƀă ngế krê ƀă 3 rơtal liăn ƀă khu pú hên.  Tiah mê, kơlo ki hên tâk troh 1.5 xôh tâng vâ pơchông ƀă luât nôkố. Ngế kăn tối tiah kố, kal tơmiât nhên, séa mơnhên ngăn ing hên tơdroăng 'na kơlo pơxâu phak kố, vâ rế rak tơniăn tơdroăng ki kơtăng dêi luât, rế ôh tá tơdjâk luâ râ troh tơdroăng rêh ối, pêi cheăng kâ dêi kuăn pơlê, khu mơdró kâ.