VOV4.Xơ Đăng - Ahdrối leh pơxiâm po hơnăm hriâm nếo, pôa Nguyễn Xuân Phúc, Kăn xiâm hnê ngăn tơnêi têa hiăng pơtroh kơthô ăm kơvâ hnê hriâm. Tung roh leh pơxiâm po kơxo kố lơ 5/9, rơtuh ngế hok tro lâp tơnêi têa hiăng châ tơmâng tơdroăng xiâm kơthô Kăn xiâm hnê ngăn tơnêi têa pơtroh kơvâ hnê hriâm. Mâu rơkong pơchân mê, mơnhên troăng la ngiâ ăm hnê hriâm tung hơnăm hriâm nếo dêi Kăn xiâm hnê ngăn tơnêi têa cho mơhnhôk mơ-eăm dêi rơtuh ngế hok tro.

Hdrối mê, pôa Phạm Minh Chính, Ngế pro xiâm hnê ngăn tơnêi têa xuân hiăng troh lăm pôu, mơhnhôk hok tro, thái cô mâu kong pơlê. A kong pơlê Phú Thọ, Ngế pro xiâm hnê ngăn tơnêi têa pơkâ, hơnăm hriâm nếo ôh tá ăm hok tro ai tơdroăng tá tŭm mơ-éa hnê hriâm, thăm hnê ‘na rêh ối lĕm tro, tơdroăng rêh ối ăm mâu vâi hdrêng.

Ngế pro xiâm hnê ngăn tơnêi têa lăm pôu hngêi trung râ má môi pơlê kân Yên Lập, tơring Yên Lập, kong pơlê Phú Thọ

Pôa Phạm Minh Chính pơkâ mâu hngêi trung pơ’lêh troăng hnê ƀă hriâm vâ ai tơdroăng ki tơdjuôm, ai tơdroăng ki krê, hnê ăm hok tro ki kơnâ khôi túa lĕm tro, khôi túa lĕm tro hdroâng mơngế. Mơdêk ‘na ivá ƀă khôi túa lĕm, mâu tơdroăng tŏng kum pơlê pơla tung hngêi trung. Ôh tá ăm ai tơdroăng ki hok tro pá puât, hok tro mơngế hdroâng kuăn ngo lôi pơtê hriâm. Tơdrêng amê, mâu kong pơlê thế tơniăn tŭm kơxop mơ-éa hnê hriâm ăm hok tro ƀă hía hé.

A Sa Ly tơplôu ƀă tơbleăng