Khu lăm séa ngăn, tăng ngăn kơxô̆ 25 dêi Khu xiâm Kal kí,  Khu kăn hnê ngăn xua pôa Trần Sỹ Thanh Ngế cheăng tung Khu Xiâm Kal kí, Kăn hnê ngăn Tíu xiâm Đảng, Ngế pơkuâ Vi ƀan Séa ngăn Tíu xiâm  pêi cheăng ƀă Ngế pơkuâ khu kăn nếo klêi pêi cheăng ƀă Khu pơkuâ Tỉnh ủi Khánh Hòa ‘na tơdroăng tơbleăng mâu pơkâ, hnê mơhno dêi Tíu xiâm.

Tơdroăng ki kal séa ngăn tơkŭm a tơdroăng tăng ngăn, hriâm tâp, hnê pêi ƀă tơbleăng Pơkâ hneăng hôp 14 dêi Đảng; mơjiâng tơdroăng pêi pro dêi kong pơlê; pakĭng mê, tăng ngăn tơdroăng hbrâ tâ phĭu rah xo kăn Kuô̆k hô̆i hneăng 16 ƀă Hô̆i đong kuăn pơlê rêm râ hneăng hơnăm 2026-2031.

Tơbleăng a rôh pêi cheăng, pôa Trần Sỹ Thanh, Kăn hnê ngăn Vi ƀan Séa ngăn Tíu xiâm tối nhên tơdroăng tơbleăng Pơkâ hneăng hôp Đảng ƀô̆ kong pơlê Khánh Hòa kal tơrŭm krá ƀă pơkâ hneăng hôp 14 dêi Đảng, tơniăn môi tuăn ing troăng hơlâ troh pêi pro. Kong pơlê kal thế hbrâ, hriê̆n plĕng ki nếo  tung tơkŭm pêi pro, mơjâng mâu túa pêi cheăng tơƀrê vâ Tíu xiâm tơkŭm tâi, po rơdâ.

Khu râ kăn mơnhên ngăn, séa ngăn kơxô̆ 21 dêi Khu xiâm kal kí, Khu pơkuâ hnê ngăn cheăng Đảng xua pôa Lê Hoài Trung, Ngế xiâm tơpui kâ pơkuâ djâ nếo tơbleăng pơkâ mơnhên ngăn, seá ngăn hơnăm 2026 ƀă Khu pơkuâ tơdroăng cheăng Đảng kong pơlê Gia Lai. Tơdroăng xiâm séa ngăn tơkŭm tung tơdroăng pêi pro mâu tơdroăng pơkâ dêi Tơnêi têa, ki rơhêng vâ tối cho tơdroăng pêi pro Tơdroăng pơkâ Hneăng hôp má XIV dêi Đảng ƀă tơdroăng hbrâ tâ phĭu kăn teăng mâ Kuô̆k hô̆i hneăng má XVI, Hô̆i đong kuăn pơlê mâu râ hneăng hơnăm 2026 – 2031.

Xông tơpui a roh hôp, pôa Lê Hoài Trung, Ngế xiâm tơpui kâ tối rơdêi mơnhên ngăn, séa ngăn vâ tơniăn mâu troăng hơlâ dêi Tơnêi têa châ pêi pro kơtăng, tơdâng tơ’mô ƀă tro troăng prôk. Tung pơla mâu khu râ kăn pơkuâ hnê ngăn Đảng dế tơkŭm pêi pro hnoăng mơnhông cheăng kâ - rêh ối pơlê pơla ƀă hbrâ ăm tâ phĭu, hnoăng cheăng kố rế djâ tơdroăng ki nếo ai, ki kal.