Lâm hnê mơhno marketing xua Khu tơrŭm cheăng kong pơlê Dak Lak tơkŭm po a tíu mơđah tơbleăng tơmeăm dêi khu tơrŭm cheăng. Mâu kuăn pơlê pêi chiâk deăng hmâ to pêi klâng chiâk, mê nôkố chiâng pêi tiê a phôn râng kŏng ki rơkê. Vâi rah hiê̆u ư̆ng, rah tíu, ti tăng tíu ki xup um ăm tơmeăm klêi mê chêh tơpui djâ. Tui lui cho ‘’tơbleăng tê’’ a tíu tê mơdró điê̆n tưh. Veăng lâm hnê mơhno, ngoh Lê Văn Việt, ngế ki veăng tung Khu tơrŭm cheăng Bazan, tơring Krông Pač, kong pơlê Dak Lak tối:

“Măng pơlê pơla ƀă tê mơdró điê̆n tưh nôkố dế cho troăng pêi vâi pêi pro, cho đi đo rêm hâi. Tâng pin ôh tá chiâng pêi há mê cho ton tơrôu ƀă  vâi. Tơdroăng tơrŭm cheăng veăng pêi tiô troăng măng pơlê pơla lơ mâu tíu tê mơdró điê̆n tưh kô cho tơdroăng ki rơdêi ăm khu tơrŭm cheăng. Xua gá kô tơbleăng ăm mơngế ki rôe xúa tung măng pơlê pơla ‘na mơngế ki khât, tơdroăng ki khât, tơmeăm ki khât’’.

Pôa Thân Cư, Phŏ kăn pơkuâ Khu tơrŭm cheăng pêi chiâk deăng tơdâng tơ’mô Čư̆ Dlê Mnông, tơring Čư Mgar, kong pơlê Dak Lak tối ăm ‘nâi, khu tơrŭm cheăng mơjiâng hơnăm 2012. Troh nôkố, khu cheăng ai 114 khu tơrŭm cheăng, ƀă lối 230 hectar pêt kơphế, tiu, sầu riêng. Tâng hdrối nah, khu tơrŭm cheăng bu hmâ ƀă tơdroăng tê hdrê, tơmeăm kơmăi kơmok, phon rơvât, tŏng gum khoa hok kih thuât ăm kuăn pơlê pêi chiâk deăng pêi lo châ tơmeăm dâi lĕm, mê nôkố vâi dế pôu râng hnoăng cheăng nếo, chiâng khu ki xiâm tung tơdroăng pro tơmeăm kơnâ, tơdjêp pêt mơjiâng ƀă kơchơ mơdró, tơbleăng inâi tơmeăm kong pơlê.  Tơdroăng xúa kŏng ngê̆ tơbleăng tơmeăm hiăng kum khu tơrŭm cheăng châ achê kơchơ mơdró rĕng ƀă rơdâ tâ. Pôa Thân Cư, tối:

“Pin thế mơdêk râ rế pêt mơjiâng hlối tơdjêp ‘nâi kŏng ngê̆ 4.0, ‘nâi tê tơmeăm, châ achê kơchơ mơdró, marketing vâ tê rôe tung kơchơ mơdró vâ vâi ‘nâi tơmeăm dêi pin hôm pêi lĕm lơ ôh. Tâng pin pêi lĕm mê pin ôh tá tối ăm vâi ‘nâi, ôh tá tối tơdroăng mê kô tro lŭp ăm pin tê’’.

Pôa Phạm Thanh Tuấn, ngế ki hnê Tơdroăng pơxiâm pơhlêh nếo tơmiât pêi rơkê tơnêi têa, ngế hiăng veăng hnê mơhno kuăn pơlê pêi chiâk deăng Dak Lak xúa mâu măng pơlê pơla, tíu tê mơdró điê̆n tưh ƀă kơmăi kơmok mơ’no tơdrêng tung um tiô troăng hyôh măng vâ châ achê tơmối ki rôe tơmeăm pin tối: Pơhlêh xúa kŏng ngê̆ dế troh a rêm kơdrum, rêm kơpeăng kŏng kuăn pơlê pêi chiâk deăng. Pơhlêh xúa kŏng ngê̆ xuân mơjiâng môi troăng tơmiât nếo, môi troăng châ chê nếo tung tơkŭm po mơjiâng, tung pơkuâ ƀă tung troăng pro inâi tơmeăm.

“Nôkố mơngế rôe xúa loi khât a mâu ngế ki mơjiâng tơmeăm, bu ai vâi nếo ai tuăn ngôa rơkê tung pơlê. Xua hên hơnăm pêi cheăng mê vâi hiăng cho mơngế ki rơkê dêi tơmeăm dêi vâi pêt mơjiâng. Tơdroăng ki má péa nếo, tung pơhlêh hlê plĕng dêi kuăn pơlê pêi chiâk deăng, vâi ôh tá tơkôm troh khu ki má pái vâ tê tơmeăm ăm pin xếo. Tâng kơtăn kố 5 hơnăm mê tối kuăn pơlê to a tíu tê mơdró tê tơmeăm, lơ livestream ‘lo, lơ tơdjêp ƀă mơngế ki rôe xúa lâp plâi tơnêi mê cho tơdroăng ki ôh tá ƀĕng ê. Laga nôkố dế cho tơdroăng ki pin thế pêi’’.

Tiô pôa Lê Văn Dần, Phŏ kăn hnê ngăn Khu tơrŭm cheăng kong pơlê Dak Lak, tung pơla kơchơ mơdró tơbriât ó môi tiah nôkố, rơtế ƀă tơdroăng pêi tiô rơxông nếo troăng pêt mơjiâng, mâu khu tơrŭm cheăng mơdêk xúa kŏng ngê̆ kơxô̆ tung tơdroăng tơbleăng, rôe tơmeăm tung tíu tê mơdró điê̆n tưh. Tung pơla kố nah, khu tơrŭm cheăng kong pơlê hiăng tơkŭm po hên lâm hnê ‘na tơdroăng tê mơdró tung măng pơlê pơla, mơjiâng inâi, mơjiâng um méa ăm khu tê mơdró, khu tơrŭm cheăng. Tung la ngiâ, Khu tơrŭm cheăng kô pơtối tơkŭm po mâu hneăng hnê mơjiâng, hnê pơtâp trâu ‘na mâu kơvâ cheăng ki phá tơ-ê dêi pó vâ tơxâng tơdroăng kal vâ mơnhông kơchơ mơdró. Pôa Lê Văn Dần, tối:

‘’Pơtối hnê mơjiâng klâ chiâng hên lâm vâ mâu khu tơrŭm cheăng châ achê mâu tơdroăng ki xiâm má môi dêi tê mơdró điê̆n tưh dêi AI, kơ’nâi mê cho mâu lâm ki hnê trâu hơngế ăm rêm tơmeăm. Xua rêm tơmeăm kô ai mâu troăng pêi ing tê mơdró điê̆n tưh phá tơ-ê dêi pó. Vâ mâu khu tơrŭm cheăng kô chiâng ối a khu tơrŭm cheăng tơná xuân kô chiâng tơbleăng, mơđah ƀă tê tơmeăm online ing mâu măng pơlê pơla nôkố. Ki rơhêng vâ tối cho kum mâu khu tơrŭm cheăng a kơpong hơngế hơngo kô chiâng achê mâu kơchơ mơdró’’.

Mâu tơdroăng mơ-eăm pơhlêh xúa kŏng ngê̆ dêi mâu khu tơrŭm cheăng a kong pơlê Dak Lak dế kum pro tơ’lêi hlâu tung pơkuâ, kum kơdroh kơxô̆ liăn, mơdêk kơxô̆ liăn châ rơkâ ăm mâu khu tơrŭm cheăng. Ki rơhêng vâ tối, xúa kŏng ngê̆ kơxô̆ tung tơbleăng tơmeăm dế po hên roh tơ’lêi hlâu nếo, kơchơ mơdró nếo, tâk ki kơnâ ƀă mơjiâng inâi tơmeăm khoăng dêi kong pơlê Dak Lak.