Kơtăn kố cho 60 hơnăm, hâi lơ 15/4/1965, Khu xiâm pơkuâ Kŏng an kuăn pơlê (nôkố cho Khu xiâm pơkuâ Mô đô̆i gâk tơkăng kong) hiăng pơtroh mâu kăn ƀô̆ hlo hên túa ki rơkê tơtro ing mâu kong pơlê Peăng kơnhŏng mot veăng kum ăm Gia Lai. Troh khế 7 rơtế hơnăm, khu Gâk kring tơniăn Gia Lai châ tơkŭm po tơdâng tơ’mô a tŭm 3 râ, pêi pro châ tơƀrê mâu tơdroăng rup mâu xâ, mâu ki ‘mêi, rak kuăn pơlê, plâ khu lêng kong têa ê, châ xo pơkuâ tơnêi. Tung plâ 10 hơnăm hdrối hâi tơleăng peăng Hdroh Tơnêi têa, khu kố hiăng veăng tơdrêng hrĭng roh plâ ƀâ kân kŭn, rup mơdât  ƀă pro tro rong hrĭng ngế lêng kong têa ê, kum rơtế kuăn pơlê lâp tơnêi têa môi tuăn tơnêi têa.

Klêi kơ’nâi 1975, khu Mô đô̆i gâk tơkăng kong kong pơlê Gia Lai pơtối ó rơdêi gâk kring hnoăng pơkuâ tíu tơkăng kong tơnêi têa, ki má môi cho mâu tơdroăng veăng kum tung roh tơplâ xâ khu lêng Khmer Đỏ. Nôkố, Khu mô đô̆i gâk tơkăng kong kong pơlê dế pơkuâ lối 80km troăng tơkăng kong tơkăng ƀă kong pơlê Rattanakri, kong têa Kul, tung pơlê pơla ai 7 cheăm ối tung 3 tơring tơkăng kong.

Drêng tơdroăng rêh ối pá puât, kăn ƀô̆ mô đô̆i gâk tơkăng kong kong pơlê Gia Lai xuân pêi kêi đeăng hnoăng cheăng ‘’tơpéa hdroh’’: rế gâk kring krá tơniăn gâk kring tơkăng kong, rế thăm veăng mơnhông cheăng kâ – rêh ối pơlê pơla a kong pơlê.

Ing hên tơdroăng ki lĕm môi tiah ‘’Kum o troh hngêi trung’’, ‘’Hngêi ăm mơngế kơtiê tíu tơkăng kong’’, ‘’Ro hdrê ăm mơngế kơtiê’’,...khu mô đô̆i gâk tơkăng kong hiăng kum pơhlêh tơniăn cheăng pêi ăm kuăn pơlê hdroâng kuăn ngo, mơjiâng gâk kring tơkăng kong tâi tâng kuăn pơlê krá rơdêi, pro krá tơniăn tơdroăng loi tơngah pơla khu lêng ƀă kuăn pơlê kơpong tơkăng kong.

Klăng roh kố, Khu xiâm pơkuâ Mô đô̆i gâk tơkăng kong kong pơlê Gia Lai hâk tơngăm tơdah Mê dái Gâk kring Tơnêi têa ối má péa dêi Kăn xiâm hnê ngăn tơnêi têa diâp ăm xua mâu tơdroăng veăng kum kân tung gâk kring hnoăng pơkuâ, gâk kring tơkăng kong. Kăn hnê ngăn Vi ƀan kong pơlê xuân diâp Ƀâng kheăn kơdeăn ăm 6 khu pú hên ƀă 9 ngế krê ki kơhnâ rơkê ai hên tơdroăng veăng kum rơkê tung tơdroăng gâk kring. Thươ̆ng tă Ngôn Ngọc Cương, Kăn Đông gâk kring tơkăng kong Ia Puch, tơring Chư Prông – môi tung mâu ngế krê hâk tơngăm châ diâp Ƀâng kheăn kơdeăn, tối:

“Á hâk tơngăm châ Vi ƀan kong pơlê diâp ƀâng kheăn kơdeăn klăng roh leh tơbâ 60 hơnăm. Tung la ngiâ á kô rơtế khu pú hên, khu râ kăn pơkuâ hnê ngăn Đảng, Đảng ŭy Khu hnê mơhno đông tơkŭm khu râ kăn pơkuâ, hnê mơhno tíu cheăng kêi đeăng hnoăng cheăng gâk kring hnoăng pơkuâ gâk kring tơkăng kong tơnêi têa. Khŏm mơ-eăm tơkŭm pơkuâ, hnê mơhno kăn ƀô̆ mâu lêng thăm pêi pro mâu tơdroăng séa ngăn tơkăng kong. Pơtâng tối mơhnhôk kuăn pơlê pêi tiô troăng hơlâ dêi Đảng, luât dêi Tơnêi têa’’.

Xông tơpui a roh leh, Thiê̆u tươ̆ng Nguyễn Đức Mạnh, Phŏ Kăn pơkuâ Mô đô̆i gâk tơkăng kong kheăn kơdeăn ƀă rơkâu mâu tơdroăng ƀlêi trâng kân, mâu tơdroăng châ tơƀrê ki mâu rơxông kăn ƀô̆, mô đô̆i gâk tơkăng kong kong pơlê Gia Lai hiăng châ tung 60 hơnăm mơjiâng, tơplâ ƀă xông kân. Pôa mơnhên, hluâ rêm hneăng tơdroăng ron ton nah, khu mô đô̆i gâk tơkăng kong kong pơlê đi đo pro krá tơniăn ‘na khu pú hên, mơjiâng đông, tíu cheăng krá tơniăn, mơdêk ivá khu kăn ƀô̆ vâ tơxâng pơkâ hnoăng cheăng tung rơxông nếo.

A roh leh, pôa Hồ Văn Niên, Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê Gia Lai xông tơpui mơnhên ƀă kheăn kơdeăn hnoăng dêi khu Mô đô̆i gâk tơkăng kong tung tơdroăng tơplâ xâ ƀă mơjiâng, gâk kring tơkăng kong Tây Nguyên. Mơnhên Mô đô̆i gâk tơkăng kong dêi kong pơlê Gia Lai hiăng mơnhông lĕm tro hnoăng ki xiâm tung pơkuâ, gâk kring hnoăng pơkuâ, gâk kring tơkăng kong tơnêi têa, gâk kring tơniăn kơpong tơkăng kong, kum mơnhông cheăng kâ – rêh ối pơlê pơla a mâu tơring, cheăm kơpong hơngế hơngo.

Kăn pơkuâ hnê ngăn cheăng Đảng kong pơlê Gia Lai pơkâ thế tung la ngiâ, Đảng ủy, Khu xiâm pơkuâ Mô đô̆i gâk tơkăng kong pơlê pơtối tơrŭm krá tơniăn ƀă mâu kơvâ cheăng, tíu cheăng dêi kong pơlê ƀă khu gâk kring tơkăng kong kong têa Kul pêi pro mâu troăng mơjiâng troăng tơkăng kong hơniâp lĕm, nhŏng o, tơrŭm, mơnhông krá tơniăn; thăm pơtâng tối, hnê hriâm, mơdêk hlê plĕng dêi kăn ƀô̆, đảng viên ƀă kuăn pơlê ‘na gâk kring hnoăng pơkuâ tơkăng kong ƀă tíu cheăng, hnoăng dêi khu mô đô̆i gâk tơkăng kong tung rơxông nếo.