*Kong mê kân mêi ton hâi a hên kơpong peăng mâ hâi Lo kong pơlê Dak Lak pro lối hrĭng ha klâng báu, pôm a cheăm Hòa Thịnh tro têa lân. Tiô cheăm kố tối, dâng 300 ha pôm ƀă lối 600 ha klâng báu tro têa lân. Cheăm hiăng pơtroh 15 ngế đoân viên droh rơtăm rơtế ƀă 50 ngế kăn ƀô̆, mố đô̆i kŏng an, chu troh tŏng gum kuăn pơlê poê báu, lâk pôm.

Trung đoân 888, Khu pơkuâ ngăn lêng kong pơlê Dak Lak, pơtroh tơ’nôm 70 ngế kăn ƀô̆, mố đô̆i troh a cheăm Hòa Thịnh veăng poê báu, lâk pôm loăng, vâ kơdroh iâ ki tro lŭp xua kong mê têa kân. Rơtế ƀă tơdroăng tŏng gum kuăn pơlê, cheăm Hòa Thịnh dế mơjiâng pro túa pơkâ hbrâ ví tiô rêm kơlo pơkâ, hbrâ mâu ngế ki lăm tŏng gum, rơxế, vâ rak tơniăn ăm kuăn pơlê ƀă kơdroh ki tro lŭp xua kong mê têa kân lân lu pro.

*Klêi kơ’nâi vâ chê 2 măng tĭng kong mêi a kơpong kân rơdâ, têa lân lu ƀă tơhnah tơhnâp tơnêi a hên cheăm bêng kong pơlê Lâm Đồng ai hên hĭn. Kơxê lơ 23/9, Vi ƀan kong pơlê pơkâ mâu cheăm bêng séa ngăn, khŏm xĕn kuăn pơlê lo ing kơpong tơ’lêi ai têa rơlêa, tơhnah tơhnâp; tơdrêng amê châ achê kơpong ki klâ, tơniăn bê kế kâ, tơmeăm ki kal xúa rêm hâi, ôh tá lôi ăm kuăn pơlê kơklêa.

 Pơtăm to cheăm chiu tơdjâk râ ó, mê cho Cát Tiên 2, Cát Tiên 3, Quảng Khê, Dam Rông 2 ƀă Quảng Sơn châ pơkâ pơtroh mơngế pêi cheăng, cano, rơxế, kơmăi kơmok tŏng gum kuăn pơlê.

Kong mêi hiăng pro dâng 60 toăng hngêi tro tơdjâk, lối 1.000 ha loăng plâi tro têa lân lu; krê cheăm Hàm Kiệm ai dâng 400 ha plâi rơgá tro lân lu. Văng Gia Bắc a Troăng kân tơnêi têa 28 pơtối tơhnâp, pro mơdât troăng klông. Tá hâi mơnhên tro rong ‘na kuăn mơngế.