VOV4 - Xơ Đăng - Kơxê lơ 13/10, Khu tơrŭm Mâu Khu mơdró kâ kong pơlê Dak Lak tơrŭm ƀă Khu tơrŭm mâu khu mơdró kâ hơnăm ối nếo kong pơlê Dak Lak tơkŭm po tơdroăng trâm mâ koh tơdah hâi Khu mơdró kâ Việt Nam lơ 13/10. A rôh trâm mâ, kăn pơkuâ Khu mơdró kâ kong pơlê tối tơbleăng tơdroăng cheăng tung 9 khế hơnăm 2022. Châ hlo mâu rôh kĭ tơkêa tâi tâng pơla Khu mơdró kâ kong pơlê Dak Lak ƀă Khu mơdró kâ hơnăm ối nếo kong pơlê Dak Lak. Dak Lak nôkố ai vâ chê 11.800 khu mơdró kâ dế pêi cheăng, ối má 22 tung lâp tơnêi têa ƀă ối má 2 tung kơpong Tây Nguyên.

Kăn pơkuâ kong pơlê Dak Lak diâp reăng rơkâu mâu Khu mơdró kâ

Ƀă tơdroăng ki mơnhông rĕng ‘na kơxô̆ ngế, khu mơdró kâ, tíu tê mơdró hiăng ai hên ivá veăng kum ăm tơdroăng ki mơnhông mơdêk dêi kong pơlê. Tiô pôa Huỳnh Văn Dũng, Kăn hnê ngăn Khu mơdró kâ kong pơlê Dak Lak, sap ing apoăng hơnăm troh nôkố Dak Lak hiăng mơjiâng nếo lối 1 rơpâu khu mơdró kâ, tâk vâ chê 26% tâng vâ pơchông ƀă khế kố hơnăm nah. Tơdroăng ki mơnhông kố kô pro tơ’nôm ivá rơdêi ăm mâu khu mơdró kâ Dak Lak veăng kum tung tơdroăng tơniăn ƀă mơdêk cheăng kâ dêi kong pơlê.

*** Klăng leh tơbâ hâi Ngế tê mơdró Việt Nam, kơxê lơ 13/10, a pơlê kong kơdrâm Kon Tum, Vi ƀan kong pơlê Kon Tum tơkŭm po Hneăng hôp tơpui tơno ngế tê mơdró roh má 2. Kố cho troăng pêi châ tơƀrê vâ kong pơlê Kon Tum teăm tŏng kum tơdrêng mâu tơdroăng pá puât, tơvâ tơvân dêi khu tê mơdró drêng troh ti tăng plĕng, séa ngăn, mơ’no liăn cheăng ƀă kum rak  tơniăn tíu tê mơdró a kong pơlê.

Tâi tâng a hneăng hôp

Xông tơpui a hneăng hôp tơpui tơno ngế tê mơdró roh má 2, pôa Nguyễn Hữu Tháp, kăn phŏ hnê ngăn Vi ƀan kong pơlê Kon Tum mơnhên, kheăn kơdeăn mâu ngế tê mơdró, khu tê mơdró hiăng mơ-eăm tơkâ hluâ pá puât, ai tơdroăng veăng kum ki kal tung rak tơniăn, mơnhông cheăng kâ – rêh ối pơlê pơla dêi kong pơlê klêi kơ’nâi pơreăng kân COVID-19.

Ƀă tơdroăng pêi tơdrăng, a Hneăng hôp tơpui tơno khu tê mơdró roh má 2, kăn teăng mâ mâu khu tê mơdró hiăng pâ thế ƀă khu râ kăn pơkuâ kong pơlê Kon Tum hên tơdroăng dế trâm tung tơdroăng tí tăng plĕng, séa ngăn, mơ’no liăn cheăng ƀă tơdroăng pêt mơjiâng tơmeăm, tê mơdró a kong pơlê.

VOV Tây Nguyên/Tơplôu: A Sa Ly - Katarina Nga