VOV4.Xơ Đăng - A tíu xiâm mơhno khôi túa lĕm tro kong pơlê Dak Lak, Khu xiâm pơkuâ kơchuâ um Việt Nam tơrŭm ƀă Khu pơkuâ mơhno túa lĕm tro – Tơ’noăng ivá – Ôm hyô kong pơlê Dak Lak nếo tơkŭm po mơđah tơbleăng kơchuâ tơdjêp – Canavan kơchuâ um lâp tơnêi têa Việt. Mơđah tơbleăng lối 100 kơtâ um dêi mâu ngế kơchuâ tung tơdroăng pêi pro canavan – Kơchuâ um lâp tơnêi têa Việt Nam ƀă mâu ngế kơchuâ um ối tung Khu kơchuâ um kong pơlê Dak Lak kơchuâ.

Tơmối lăm ngăn tíu mơđah tơbleăng

Mâu um kơchuâ tơdroăng rêh ối, pêng păm tơdroăng rêh ối dêi kuăn mơngế ƀă kơpong tơnêi Tây Nguyên. Canavan kơchuâ um lâp tơnêi têa Việt Nam châ pêi pro hơnăm 2022, cho môi tíu kơchuâ um ai 20 ngế kơchuâ um châ rah xo. Roh lăm kơchuâ um lâp Việt roh kố châ tơkŭm po ing tơrŭm dêi Khu pơkuâ kơchuâ um Việt Nam ƀơrô peăng Hdroh ƀă Vietnam Art Space, pơxiâm ing Pơlê kong kân Hồ Chí Minh troh tíu má mơ’nui cho Đà Nẵng, drô troăng prôk kô tơkâ hên kong pơlê, môi tiah: Dak Lak, Kon Tum, Bình Định, Phú Yên vâ mơhno túa ki lĕm tro dêi mâu kơpong tơnêi têa ing tơdroăng ki rơkê kơchuâ um dêi mâu ngế kơchuâ.