Phŏ Ngế pro xiâm hnê ngăn tơnêi têa pơkâ thế rĕng pro, mơ-eăm pro rĕng kêi ăm rơxê châ kơtâu troăng mê hdrối hâi lơ 2/9 ƀă thế pê klêi troăng mê tung hơnăm kố. Tiô tơdroăng tơkêa bro rôh má 2 pơla tíu tơkâ luâ 2 kong pơlê, xua Khu xiâm mơjiâng pro tơmeăm khoăng pơkuâ pro, Khu rak ngăn tơdroăng tơkêa pro troăng rơxế lơ treng pơkuâ ‘no liăn pro, ki xŏn 37,5km. Tiô ngế pơkuâ ‘no liăn pro tối, kong mêi têa lân lu ton tung hơnăm 2025, tíu ki mơjiâng pro pá puât rơnâk ngo hên kông, klôh pong pá kơdâm ngo hlối pro to yă tơmeăm mơjiâng pro chiâng tơdjâk troh tơdroăng pêi pro, nôkố pêi nếo klêi dâng 65%.

                                Pŭn to klôh pong pá kơdâm ngo mê Ea Trang 1, Ea Trang 2, Phượng Hoàng ƀă Chư Te ki xŏn troăng mê 5.550m hiăng chiâ kloh ăm phuâng pá tá, dế meăm ƀê tong pro ki klup kơpêng dêi troăng pá kơdâm ngo hlối krâ ‘măn kơmăi vâ ‘nâi kih thuât. Hlo ki hrá  dêi tơdroăng tơkêa pro, Phŏ Ngế pro xiâm hnê ngăn tơnêi têa pơkâ thế rĕng pêi vâ rĕng klêi ăm rơxế châ kơtâu.

A rôh tí tăng ngăn, kăn xiâm hnê ngăn kong pơlê Dak Lak pơkâ thế Tíu xiâm ăm troăng hơlâ ‘no liăn pro dâng 5km troăng tơdjêp ƀă troăng kân tơdrăng Khánh Hòa - Buôn Ma Thuột ƀă troăng kân Đông Tây, troăng ki tơdjêp tơkâ luâ kơpong tơraih tơƀai Buôn Ma Thuột vâ mơdêk châ tơƀrê ăm rơxế kơtâu a mâu troăng mê.