Kố cho tơdroăng ăm hlo tơbrê châ tơpui a rôh Hôp ‘na tíu tơkăng kong, tơdroăng cheăng Đảng, tơdroăng kal kí pái khế apoăng  hơnăm 2026 dêi Khu xiâm pơkuâ Mố đô̆i gak tơkăng kong Dak Lak. Pái khế apoăng hơnăm 2026, Đảng ủi, Khu xiâm pơkuâ Mố đô̆i gak tíu tơkăng kong Dak Lak hiăng hnê kơtăng, tơbleăng hnê pêi pro mâu tơdroăng dêi râ kơpêng pơcháu ăm mâu lêng, lêng ki tơplâ, hnoăng cheăng lêng pêi pro a tíu tơkăng kong tơnêi têa.

Tung la ngiâ, Khu xiâm Mố đô̆i gak tơkăng kong Dak Lak ‘nâi nhên, pơtối rak ngăn kong krá, kring vế hnoăng pơkuâ tíu tơkăng kong tơnêi têa; pơtối  hbrâ rơnáu; mơdêk tơƀrê hriâm, tơplâ hbrâ mơdât mâu ki ai xôi; malối tơmâng khât luât hbrâ mơdât tơnăng ká ôh tá tro luât, ôh tá tối tơbleăng ƀă ôh tá tiô pơkâ IUU.