A rôh tơdah, pôa Trịnh Văn Quyết Ngế tăng ‘nâi plĕng mâu tơdroăng ăm tíu xiâm tơnêi têa tơpui tơno ƀă pôa Rogelio Polanco Fuentes, kăn teăng mâ ‘na mâu tơdroăng ki kal tơrŭm cheăng pơla péa Đảng tung kơvâ ‘na tuăn mơhno, hnê mơhnhôk cheăng kal kí, chêh in hlá mơ-éa; vâ tơrŭm mơdêk tơbleăng pêi tơdroăng Tơhrâ tơrŭm cheăng pơla Khu tăng ‘nâi plĕng mâu tơdroăng ăm tíu xiâm tơnêi têa Ƀă Tuăn tơmiêt Tíu xiâm Cuba, tung mê, ai khu tơrŭm hôp tơpui tơno chuyên đề hơnăm 2026.

Rôh kố, pôa Trịnh Văn Quyết tối: Đảng, Tơnêi têa ƀă kuăn pơlê Việt Nam đi đo séa ngăn nhên rơtế ƀă Đảng, Tơnêi têa ƀă kuăn pơlê Cuba; tối loi kơ Đảng kong sản Cuba, troăng hơlâ kak kí krá kak, tuăn ngôa ƀă túa pêi cheăng kăch măng hên, ôh tá pơtê mơhnhôk tơrŭm môi tuăn dêi rơpó tung tâi tâng Đảng, tâi tâng kuăn pơlê, ai troăng hơlâ pêi tơtro vâ tơkâ luâ tŭm tơdroăng xơpá pơloăng mơnúa, môi tuăng tiô troăng hơlâ kăch măng.