VOV4.Xơ Đăng - Tơdroăng pơkâ pêi pro tiô Hneăng mơhnhôk “Mơngế Việt Nam kơjo xúa tơmeăm Việt Nam” pơla hdrối kố nah hiăng pro pơxúa kân khât, môi tiah mơjiâng khu pêi cheăng tơrŭm, mơ’no tê kế tơmeăm Việt Nam krá tơniăn; kơxô̆ kế tơmeăm Việt Nam hiăng châ mơ’no tê tung hên tíu ƀă hên hĕng mâu tơdroăng ki ê. Ing mê, veăng kum ăm mơngế rôe xúa tơmeăm châ rah rôe xo xêh kế tơmeăm ki dâi lĕm.

Pêi pro tiô tơdroăng tơleăng Mơhnhôk “Mơngế Việt Nam rôe xúa tơmeăm Việt Nam’’, hdrối mê hiá nah hên mâu khu mơdró tung tơnêi têa hiăng tơbleăng hên troăng rơhlâ po rơdâ tơmeăm pê pro, xúa tung tơnêi têa; mơdêk tơmeăm ki pro tung tơnêi têa, kum tơmeăm pêi pro, inâi tơmeăm; po rơdâ tăng tíu tê, malối a mâu kơpong thôn pơlê,kơpong hngế hơngo. Ing mê kô mơhno tro hnoăng tơná tung rak tơniăn mung tê tơmeăm xúa môi tiah phái, kế kâ...

Tiô tối dêi hên ngế ki rôe xúa, nôkố tơmeăm Việt Nam dế rế hên ngế vâ rôe xua tơtro, yă ôh tá kơnâ tơxâng bă tơdroăng rêh ối dêi pơlê pơla. Tơdrêng amê ki tơ-brê, túa pro rế châ mơdêk tơ-brê, hên túa... mâu tơmeăm châ hên ngế vâ rah xo malối: tơmeăm pêi lo ing chiâk deăng, hmân ếo, tơmeăm xúa. Pôa Chu Quang Hào, Ngế pơkuâ xiâm kŏng ti Bưu điện Việt Nam ăm ‘nâi, ing hơnăm 2019 Khu xiâm kŏng ti hiăng ‘no liăn ƀă tơbleăng tơmeăm tê ‘na điê̆n tưh Postmart.vn vâ mơdêk tê mâu tơmeăm tung tơnêi têa tơmeăm pêi pro.

Krê hơnăm nah, tâi tâng tơmeăm tê hiăng châ 120 rơtal liăn, hiăng tê ăm lối 100 rơpâu tâ̆n tơmeăm pêi lo ing chiâk deăng dêi rơnó ăm kuăn pơlê a hên kong pơlê tung lâp tơnêi têa môi tiah: Bắc Giang, Lào Cai, Bến Tre... tơdrêng ƀă hên kong pơlê, pro pơxúa hên tơ-brê tung tê tơmeăm ăm kuăn pơlê ki pêi chiâk ƀă hên khu mơdró tung lâp tơnêi têa:

“Mê cho mâu tơdroăng ki hdró apoăng, ki kal dêi tơdroăng tê mơdró điê̆n tưh dêi Postmart dêi Bưu điện Việt Nam hiăng châ chiâng pêi pro tung 2 hơnăm hdrối drêng pơreăng kân tâ tú. Nôkố ƀă tơdroăng cheăng châ Chin phuh, mâu Khu xiâm tối ăm ‘nâi mâu todroăng ƀă hyôh rơ’jiu internet pơcháu mê cho mơjiâng ƀă tơbleăng tơdroăng tê điê̆n tưh dêi Postmart chiâng tơmeăm hmâ xua dêi mơngế Việt Nam, vâ djâ tâi tâng mâu tơmeăm pêi lo ing chiâk deăng dê kơpong xuân môi tiah mâu tơmeăm dêi Made in Việt Nam châ tê  điê̆n tưh”.

Tiô pôa Đỗ Thắng Hải, Ngế xiâm phŏ ngăn Khu xiâm tê mơdró, nôkố kơxô̆ tơmeăm Việt Nam tê a siêu thĭ, a kơchơ kân hiăng tâk troh 80-90%, krê tơmeăm Việt Nam tê a mâu siêu thĭ Go dêi Grup Central Retail hiăng tâk troh 94-96%, a kơchơ hmâ tê châ sap 60-70%... Tiah mê, tơdroăng mơhnhôk nhên hiăng mơhno ki tơ-brê kân kĭn.

Pôa Đỗ Thắng Hải xuân ăm ‘nâi, vâ pơtối tơbleăng pêi tơ-brê tơdroăng mơhnhôk tung la ngiâ, Khu xiâm ngăn tê mơdró hiăng mơjiâng ƀă châ Ngế pro xiâm hnê ngăn Chin phuh kĭ tơdroăng tơkêa bro mơdêk tê mơdró tung tơnêi têa rơtế ƀă tơdroăng mơhnhôk mơngế Việt Nam rôe xua tơmeăm Việt Nampơla hơnăm 2021-2025.

Tơdroăng Tơkêa bro ai pơxúa khât tung rak tơniăn rêh ối dêi kuăn pơlê, pơtối rak vế mơnhông mơdêk cheăng kâ-rêh ối tơniăn hlo tơdroăng dế ôh tá tơniăn ‘na cheăng kâ tung lâp plâi tơnêi; pơloăng mơnúa dêi khu tơrŭm cheăng ƀă tơdjâk dêi pơreăng COVID-19.

‘’Tung Tơkêa bro mê pêi pro mâu tơdroăng pơkâ vâ veăng ‘no hnoăng mơnhông mâu tíu mơdró tung tơnêi têa, tơkŭm pêi tơbrê tơdroăng xing xoăng tơmeăm tê. Ing mê, mơjiâng tơdroăng ki pơxúa mung tơmeăm tê châ  tơniăn, tơrŭm krá pơla mâu khu ngế tung tơdroăng tê mơdró ƀă dêi rơpó ing mơngế ki pêi pro troh mơngế rôe xúa ing Tíu xiâm troh kong pơlê ing khu mơdró ƀă troh mâu kơ koan rak ngăn tơnêi têa vâ djâ tê tơmeăm ki dâi lĕm ing hên kơpong pơrá phá dêi rơpó troh kŏng kuăn pơlê rôe xúa a kong pơlê tơ’mot mâu tơmeăm pêi lo ing chiâk deăng a kong pơlê châ tê troh mâu kong pơlê ki ê, pơlê kong kơdrâm, kong kân”.

Vâ pơtối mơdêk tơdroăng hnê mơhnôk “mơngế Việt Nam thế rôe xúa tơmeăm Việt Nam” xuân môi tiah vâ tơmeăm Việt Nam rế châ hên kuăn pơlê tung tơnêi têa vâ rôe xúa tâ nếo, mâu khu mơdró kal mơdêk mơjiâng inâi, pơ’lêh nếo, hriăn pro tơ-ê tung ‘no liăn rôe tơmeăm ‘na khoa hok kơmăi kơmok tiô túa nếo nôkố vâ kơdroh yă tơmeăm, mơdêk ki tơbriât tê.

Mơdêk po rơdâ tơrŭm tung tê mơdró, tơrŭm mơjiâng veăng a mâu tơdroăng mơdró vâ tơmeăm tê mơdró rế ton rế tơ-brê, krá lê̆m tâ.

Nguyễn Hằng- VOV1