Hneăng hôp mơgêi 5 hơnăm tơ’noăng mơjiâng ‘’Đông lêng ƀok thái pơkeăng 5 tơtro’’ tâi tâng khu lêng roh má 3, tơkŭm po a kơxo lơ 13/6. 5 hơnăm hiăng hluâ, tơdroăng tơ’noăng mơjiâng ‘’Đông lêng khu lêng ƀok thái pơkeăng 5 tơtro’’ hiăng mơnhông mơdêk châ tơƀrê tơdroăng pêi lâp kuăn pơlê, trâu hơngế tung tâi tâng khu lêng.

Khu râ kăn pơkuâ hnê ngăn cheăng Đảng, khu râ kăn pơkuâ mâu râ rế hía rế tơmâng hên tâ ƀă tơdroăng pêi cheăng rak ngăn, rak vế ivá mô đô̆i ƀă kuăn pơlê. Hên hơnăm pơtối, kơxô̆ mâu lêng ivá mo sêi têi ‘răng tâi tâng khu lêng lối 98%.

Rơkê ‘na kih thuât ƀă hiâm mơno khăm pơlât dêi kăn ƀô̆, nhân viên, mâu lêng pro ƀok thái pơkeăng châ tơtêk, tơxâng tơdroăng pơkâ mơjiâng kơvâ khu lêng pro ƀok thái pơkeăng ‘na tơkŭm po, rơkê tung pêi cheăng, krá tơniăn kal kí troăng tơmiât, hiâm mơno tung pêi cheăng; tơxâng tơtro hnoăng cheăng kal kí châ pơcháu.

Khu lêng ƀok thái pơkeăng ối veăng châ tơƀrê tung rak vế hơniâp lĕm khu lâp kong têa. Ing mâu tơdroăng hiăng châ tơƀrê, Đăi tươ̆ng Phan Văn Giang, Ngế xiâm pơkuâ lêng pơkâ, tung la ngiâ, mâu kơ koan, tíu cheăng tâi tâng khu lêng ƀă kơvâ khu lêng ƀok thái pơkeăng pơtối thăm pêi pro rơdêi, mơnhông tơdroăng tơ’noăng, hriăn plĕng mâu tơdroăng nếo ƀă kơvâ khu lêng ƀok thái pơkeăng tung rơxông nôkố, vâ ai troăng tơniăn khu lêng pro ƀok thái pơkeăng teăm tơdrêng pơlât mơngế tamo châi.