VOV4.Xơ Đăng - Kơ’nâi 7 hâi pêi cheăng thâ, kơtăng ƀă pê tâi hnoăng cheăng pơcháu, hâi lơ 9/10, a Tíu pêi cheăng xiâm Đảng, Hneăng hôp roh má tơdrốu dêi khu kăn xiâm Đảng hneăng 13 hôp mơgêi ai hnoăng pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng.

Tơbleăng a rôh mơgêi, pôa Nguyễn Phú Trọng tối nhên, môi tơdroăng ki nếo a Hneăng hôp roh kố: cho rôh apoăng khu kăn xiâm hiăng séa ngăn, pơkâ mâu kăn ƀô̆ khu xiâm rak ngăn pơtê veăng Tung khu kăn ƀă tối tơbleăng ‘na mơhno xoăng tơdroăng cheăng ăm mâu kăn ƀô̆ klêi tro tơtrâ hôu khĕn, pơxâu, ƀă mâu kăn cheăng tung tíu xiâm Đảng pôa Nguyễn Thành Phong, Huỳnh Tấn Việt, Bùi Nhật Quang, ƀă pơkâ tơtrâ hôu khĕn pơxâu pôa Phạm Xuân Thăng, Ngế cheăng tung tíu xiâm Đảng; kăn hnê ngăn Đảng ủy kong pơlê, Kăn hnê ngăn Hô̆i đong kong pơlê Hải Dương ƀă tơdroăng mơ’no lo ing Đảng.

Pôa Nguyễn Phú Trọng, Kăn xiâm pơkuâ hnê ngăn Đảng tối mơgêi a rôh hôp má tơdrốu hneăng 13

Kăn xiâm pơkuâ hnê ngăn Đảng pơkâ thế tối loi tơngah tâi tâng Đảng, tâi tâng kuăn mâu lêng ƀă tâi tâng kuăn pơlê kô tơkŭm pê klêi mâu pơkâ, tối mơgêi a hneăng hôp tíu xiâm roh kố, veăng pêi tơƀrê tơdroăng pơkâ Hneăng hôp má 13 dêi Đảng, pro ăm tơnêi têa pin rế ton rế rơdêi, kuăn pơlê pin rế tơniăn lĕm.

VOV/Tơplôu: A Sa Ly