Klêi kơ’nâi 2 hâi tơdế pêi cheăng thâ, kơtăng ƀă pôu râng hnoăng cheăng, kơxo lơ 17/5 a Tíu pêi cheăng xiâm Đảng, Hneăng hôp tơdế hneăng Khu xiâm pơkuâ Đảng hneăng má 13 hiăng hôp mơgêi. Pôa Nguyễn Phú Trọng, Kăn xiâm pơkuâ hnê ngăn Đảng pơkuâ ƀă ai ƀai xông tơpui ki kal mơgêi hneăng hôp. Hvái ngăn tơdroăng châ tơƀrê ing apoăng hneăng troh nôkố, pôa Nguyễn Phú Trọng tối ăm ‘nâi, pin hiăng pêi pro ƀlêi trâng pơkâ, hnoăng cheăng: Rế tơkŭm hbrâ, mơdât pơreăng, rế pro tơniăn ƀă mơnhông cheăng kâ - rêh ối pơlê pơla, mơjiâng tơdroăng cheăng kâ tơniăn krê, pơkuâ xêh; thăm mot tơrŭm lâp plâi tơnêi trâu hơngế ƀă châ tơƀrê.

Ing tơdroăng ki ai khât pơkuâ, hnê mơhno tung tơdế apoăng hneăng má XIII pơla kố nah, pôa Nguyễn Phú Trọng, Kăn xiâm pơkuâ hnê ngăn Đảng tối nhên, 5 ƀai hriâm ki rơkê tơtro ‘na pơhlêh nếo troăng pơkuâ ƀă troăng pêi cheăng tung mê, thế tơkŭm kơjo tơbleăng ăm pêi pro tơdâng ƀă dâi lĕm luât, mâu pơkâ, pơkâ pêi vâ pêi pro kơtăng, môi tuăn tung tâi tâng Đảng ƀă khu cheăng kal kí.

Tối troh ‘na troăng pêi hnoăng cheăng sap ing kố troh tâi hneăng hôp má 13, pôa Nguyễn Phú Trọng pơkâ thế, tơkŭm kơjo pêi pro lĕm 5 hnoăng cheăng ki xiâm; ki rơhêng vâ tối tơtrŏng pêi pro rơdêi ƀă pêi pro lĕm tro tâ mê nếo tơdroăng mơjiâng, rak pro tơniăn tung Đảng ƀă khu cheăng kal kí krúa lĕm, ó rơdêi.