Kơxê lơ 22/12, a VinWonders Nam Hội An, kong pơlê Quảng Nam, tơkŭm po tơdroăng mơgêi Hơnăm Ôm hyô Tơnêi têa – Quảng Nam 2022. Hơnăm Ôm hyô tơnêi têa 2022 hiăng ai lối 210 tơdroăng ki kal mơhno khôi túa lĕm tro, ôm hyô tơkŭm po tung lâp tơnêi têa, tung mê, krê Quảng Nam tơkŭm po 73 tơdroăng kal, kum troh lâp lu hnoăng, châ tơƀrê dêi ôm hyô ƀă tơdroăng cheăng kâ tơnêi têa. Mơhé tơmối ôm hyô lâp plâi tơnêi têa troh Việt Nam tá hâi châ tiô tơdroăng kal vâ, laga hơnăm 2022, Việt Nam hiăng tơdah 3,5 rơtuh roh tơmối.

Tâi tâng kơxô̆ tơmối ôm hyô tung tơnêi têa châ lối 101,3 rơtuh roh. Tâi tâng kơxô̆ liăn châ xo ôm hyô tiô tối hdrối châ 465 rơpâu rơtal liăn. Tơdroăng nghê̆ thuât a leh mơdêi hơnăm Ôm hyô Tơnêi têa – Quảng Nam 2022 ton 90 phut, pơtroh tơdroăng pơtâng hnê tối Quảng Nam – kơpong tơnêi pêng păm khôi túa lĕm, tơdroăng mơnhông mơdêk kăch măng, pơ’lêh nếo ƀă hía hé, ƀă hên tơmeăm, loăng pơlái kong kế, khôi túa lĕm vâ mơnhông mơdêk ôm hyô.

Leh mơgêi cho tơdroăng mơgêi tơdroăng kal Hơnăm ôm hyô tơnêi têa vâ mơgêi, mơnhên tơdroăng châ tơƀrê tơkŭm po hơnăm ôm hyô tơnêi têa – Quảng Nam 2022; tơdrêng amê, pơcháu ăm Hlá cơ tơkŭm po Hơnăm ôm hyô tơnêi têa 2023 ăm kong pơlê Bình Thuận ƀă tơdroăng pơrá ‘’Bình Thuận – Tơkŭm tơdroăng ki rúa lĕm’’.