Kơxê hâi lơ 15/5, a Hà Nội, Khu lo tŏng veăng Việt Nam mơhnhôk veăng tơlo liăn ‘măn kơdĭng “Rơtế ƀă vâi hdrêng kơtiê, chó chêng tơvê kŏng”. Tiô Khu lo tŏng veăng Việt Nam, ai dâng 4 rơtuh ngế vâi hdrêng ôh tá châ xúa ki iâ cho tơdroăng ki pơxúa tung pơlê pơla: lối 160 rơpâu 400 ngế hdrêng chó chêng tơvê kŏng pá xôp 17 hơnăm kal châ tŏng kum ing pơlê pơla; lối tơdế kơxô̆ vâi hdrêng kuăn ngo a Việt Nam cho vâi hdrêng kơtiê hên troăng.

Xua mê, tơdroăng mơhnhôk veăng tơlo liăn ‘măn kơdĭng “Rơtế ƀă vâi hdrêng kơtiê, chó chêng tơvê kŏng” vâ mơhnhôk kuăn pơlê tung lâp tơnêi têa rơtế veăng tơlo kế kâ, tơmeăm, liăn, vâ kum ăm vâi kế kâ, tơmeăm, rơxế kró, hơpiâp pế pơchên, mơjiâng pro tíu têa krúa ăm vâi hdrêng kơtiê, chó chêng, kuăn tê, ki tro tơdjâk xua pơreăng COVID-19, vâi hdrêng kơpong kơtiê xơpá, vâ mơdêk ai trếo kơdiâm, ai tơdroăng rêh ối tơniăn ăm vâi hdrêng.

Tung pơla tơbleăng mơhnhôk veăng tơlo liăn ‘măn kơdĭng “Rơtế ƀă hdrêng kơtiê, chó chêng tơvê kŏng’’ sap hâi lơ 12/5 troh hâi lơ 10/7/2023 ai 2 tơdroăng mơhnhôk veăng tơlo mê cho: Tơlo ing chêh tin nhắn TE pơtroh ăm 1406 (20.000 liăn môi tin nhắn) tâng ôh veăng Tơlo ing Tài khoản veăng kum mâu kơtiê hơnăm 2022).