Troh nôkố, chât rơpâu ngế thái cô Hngêi trung râ má páo Plei Me a cheăm Ia Ga, tơring Čư̆ Prông, kong pơlê Gia Lai, xuân hâi châ kâ tâi tâng kơxô̆ liăn kum tơ’nôm lối 800 rơtuh liă, cho liăn ki ‘măn ăm mâu thái cô hnê a kơpong xơpá. Pôa Nguyễn Thế Hùng, Ngế pơkuâ hngêi trung râ má pái Plei Me, cheăm Ia Ga, tơring Čư̆ Prông ăm ‘nâi, hngêi trung ối chĕn 27 ngế kăn ƀô̆, thái cô a hngêi trung liăn tŏng kum tơ’nôm tung 6 khế, sap khế 7 troh khế 12/2021, tâi tâng kơxô̆ liăn 837 rơtuh liăn.

Hngêi trung râ má pái Plei Me, cheăm Ia Ga, tơring Čư̆ Prông, Gia Lai

Sap apoăng hơnăm troh nôkố, hngêi trung hiăng hên hdrôh pơtroh hlá đơn pâ thế Khu xiâm ngăn hnê hriâm ƀă hnê mơjiâng tuăn ngôa rơkê kong pơlê ƀă Liên đoân ngăn Pêi cheăng kong pơlê Gia Lai séa ngăn, la hâi châ tơbleăng klêi. Tiô ăm ‘nâi ki xiâm dêi tơdroăng hrá ăm liăn kơ thái cô hngêi trung râ má pái Plei Me cho Khu xiâm hrá po ngăn tơdroăng Pơkâ dêi Vi ƀan ngăn kuăn ngo chêh kĭ inâi mâu thôn kơtiê xơpá kơpong hdroâng kuăn ngo ƀă kong ngo pơla hơnăm 2021-2025. Tơdroăng amê chiâng ôh tá teăm ‘mâi hơ’lêh luât pơkâ tŏng kum tung 6 khế mơ’nui hơnăm 2021 ăm mâu kăn ƀô̆ thái cô dêi Hngêi trung râ má pái Plei Me.