Mâu tíu pêi cheăng ngăn ‘na on tơhrik tơrŭm ƀă mâu kơvâ cheăng kong pơlê Dak Lak dế tơbleăng pro mâu hlá mơ-éa vâ mơjiâng pro tíu ‘măn kơmăi biến áp 110kV Lăk. Tiô pơkâ châ kĭ, tíu ‘măn kơmăi biến áp 110 kV Lăk mơjiâng pro a cheăm Dăk Liêng, tơring Lăk, kong pơlê Dak Lak.

Tơmeăm khoăng mê xua Khu xiâm kŏng ti ngăn on tơhrik kơpong tơdế tơnêi têa pro xiâm ‘no liăn cheăng, mê ai 2 troăng kơxái 110kV.  Ƀă tâi tâng ki xŏn gá vâ chê 50km, 1 tíu ‘man kơmăi (TBA) ai tâi tâng ivá kơtâu 50 MVA . Tâi tâng kơxô̆ liăn mơjiâng pro lối 180 rơtal liăn.

Tơdrêng ƀă tơdroăng tơkêa bro mê, Khu ngăn on tơhrik Dak Lak xuân tơbleăng pê klêi hnhâng kơxái on tơhrik Trung áp 35kV ƀă 22kV tơdjêp kơ’nâi Tíu ‘măn kơmăi biếp áp 110kV Lăk vâ pơtối ăm kơmăi kơtâu tơ ƀrê. Tơdroăng tơkêa bro mê kdrêng hiăng pro klêi ah hlối xúa a hơnăm 2024 kô mơdêk tơdroăng mơ’no on tơhrik ăm tơring Lăk, mơdât ki hngăm hngo ăm mâu tíu ‘măn kơmăi biếp áp 110kV Krông Bông.