Hâi lơ 20/6, Hlá tơbeăng Nhân dân tơrŭm ƀă Nhà xuất bản Chính trị quốc gia Sự thật in mơ’no kơxop hlá mơ-éa “Pôa Nguyễn Phú Trọng, Kăn xiâm pơkuâ hnê ngăn Đảng ƀă tơdroăng loi tơngah dêi kuăn pơlê tung tơnêi têa ƀă tơdroăng ki môi tuăn dêi mâu vâi pú tung lâp plâi tơnêi”. Hbo lối 600 kơtâ, kơxop mơ-éa cho tơdroăng ki tơkŭm ƀă rah xo hên ƀai chêh, ƀai thơ, hên kơthô mơhno hiâm mơno pâ nhuô̆m kơ pôa Nguyễn Phú Trọng, Kăn xiâm pơkuâ hnê ngăn Đảng dêi hên hĭn mâu rơxông kuăn pơlê ƀă vâi pú kong têa ê tung mâu kơtâ  hlá tơbeăng điê̆n tưh, măng pơlê pơla.

Kơxop hlá mơ-éa kố ai pái tơdroăng: Tơdroăng má 1 – Krá tơniăn loi tơngah tung pơkuâ, hnê mơhno dêi kăn xiâm pơkuâ hnê ngăn Đảng; tơdroăng má 2 – Hiâm mơno dêi kuăn pơlê tung tơnêi têa ƀă pôa kăn xiâm pơkuâ hnê ngăn Đảng ƀă tơdroăng má 3 – Tơdroăng ki môi tuăn dêi mâu vâi pú a kong têa ê.

Tung kơxop hlá mơ-éa, pakĭng mâu ƀai chêh ‘na ivá khên tơnôu dêi ngế pơkuâ, cho mâu ƀai chêh tối ‘na hiâm mơno tơdrăng, têm rơpiât dêi kăn xiâm pơkuâ hnê ngăn Đảng ƀă kuăn pơlê, vâi pú hmâ, mâu vâi pú ƀă tá tơdroăng ki pơxâu phâk kăn ƀô̆ bro xôi.

Tung lối hrĭng tơdroăng ƀai chêh, ƀai thơ môi tiah mê, mâu ngế ki rơkê, khu ki hriăn ‘na khoa hok, văn ngê̆ sih, kăn ƀô̆, đảng viên, ngế pêi cheăng hiăng tối tơdroăng ki pâ nhuô̆m ƀă hiâm mơno tơdrăng má môi ăm kơ kăn pơkuâ kân má môi dêi Đảng pin.