Ing khế 7 hơnăm kố a thôn Tân Hạ, cheăm Tà Năng, kong pơ lê Lâm Đồng kân rơdâ tâ, krâm kuăn mơngế tâ, klêi tơ’mot tơdjuôm ƀă thôn Chơ Ré. Tâi tâng tơnêi 476 ha, lối 390 rơpŏng kuăn pơlê, ki hên to kuăn ngo, tơdroăng cheăng pro phŏ hnê ngăn chi ƀô̆, hlối pro kăn thôn Cil K’Hạnh chiâng tơbrêi xua pêi cheăng hên.

Pro ti lâi vâ kuăn pơlê péa kơpong ôh pá ai tuăn tơmiât “ngế ton, ngế nếo”, kuăn pơlê rơtế ƀă khu cheăng Măt trâ̆n troh lăm pôu tơrêm rơpŏng hngêi vâ tơpui tơno. Tung mâu rôh hôp lơ mâu hâi pêi cheăng tơdjuôm, kuăn pơlê xing xoăng vâ kuăn pơlê thôn ton rơtế veăng pêi, rơtế pêi môi tơdroăng cheăng.

Ki tơxâng vâ tối má môi cho rôh lăm pêi cheăng apoăng mơgrúa troăng klông pơlê klêi tơ’mot tơ djuôm thôn Chơ Ré ƀă thôn Tân Hạ, Ngế ki ‘nâ po nhâ, po tơnêi, pêt reăng, ngế ki ‘nâ mơgrúa văng tah xok; rêm ngế hlối pêi hlối tơpui, tó ƀă rơtế ‘nân ôu têa. Ngăn troăng thôn Tân Hạ lĕm krúa tâ, jâ K’Hạnh hlo nhên ki pơ’lêh.

“Klêi tơ’mot, a tơmiât tơdroăng ki kal má môi cho ôh tá lôi kuăn pơlê ai tuăn tơmiêt, “ngế ton, ngế nếo’’, mê thế ngăn tâi tâng xuân cho kuăn pơlê môi to thôn Tân Hạ. Xua mê, a mơ-eăm achê, hmâ, hlối tơmâng kuăn pơlê a péa kơpong, tơdroăng cheăng tơdjuôm rơtế pêi ƀă dêi rơpó tơpui tơno, rơtế veăng pêi vâ rơtế xoăng dêi rơpó hnoăng cheăng pêi. Á ôh tá chiâng thế kuăn pơlê tơrŭm môi tuăn dêi rơpó tơdrêng hlối, mê thế tăng rôh vâ rêm ngế trâm dêi rơpó, hlê dêi rơpó hlối rơtế pêi cheăng ƀă dêi rơpó. Drêng hiăng rơtế pêi môi tơdroăng cheăng, rơtế ai pơxúa tơdjuôm mê ki kơtăn kô chôa xut tah’’.

Tuăn loi tơngah troh kuăn pơlê ôh tá xê ing mâu rơkong tơpui ki lĕm, mê châ mơjiâng ing tơdroăng châ tơƀrê tơdroăng cheăng. Jâ K'Hạnh tăng 'nâi plĕng ăm khu râ kăn pơkuâ cheăm Tà Năng po lâm hnê hriâm 'na khoa hok kih thuât păn mơnăn mơnôa, pêt mơjiâng tơmeăm ăm kuăn pơlê, tơkŭm po ăm kuăn pơlê lăm hriâm tâp túa ki rơkê tơtro…

Jâ K'Hạnh mơhnhôk vâi krâ nhŏng o hơ'lêh mâu ƀăng tơnêi ki pêt loăng plâi ki ôh tá dâi lĕm pêt mâu hdrê loăng ki tơtro nếo. Ƀă mâu rơpŏng ki ối xơpá, nâ hnê mơhno troh tơdroăng ki mung liăn kơjo gum. Troh nôkố, thôn ai 78 rơpŏng mung liăn Hngêi rak liăn tŏng kum rêh ối pơlê pơla, tâi tâng kơxô̆ liăn chĕn lối 6,2 rơtal liăn; ƀăng tơnêi pêt kơchâi plâi pôm vâ chê 8 ha, tâk 3 ha tâng vâ pơchông ƀă apoăng hơnăm.

Thôn xuân xo rak ngăn lối 780 ha kong. Krê tơná nâ K’Hạnh xo păn roăng muăn Ka Să Ha Cường (hok tro lâm 3) xua tơdroăng rêh ối pá puât. Nâ Cil Yŭ K’Im ối a thôn Tân Hạ hlo nhên 'na jâ Cil K’Hạnh:

“Jâ Cil K’Hạnh cho môi ngế kơdrâi pơkuâ thôn kơhnâ pêi cheăng ki djâ troăng ahdrối, đi đo mơhno vâi vâi krâ nhŏng o tung pơlê hlo. Mê cho um méa ki ngin rơhêng vâ hriâm. Kơnôm nâ mê ngin 'nâi túa ki tơpui kâ, mơdêk ki hlê plĕng tung pơlê pơla”. Hdrối nah drêng jâ K'Hạnh ối pêi cheăng tung kơvâ ngăn pơkeăng thôn pơlê, drêng ai tơdroăng klâi, nâ pơrá kơhnâ tung tơdroăng pơlât apoăng, châ kum hên ngế, xuân môi tiah tŏng kum pro hlá mơ-éa ăm mâu ngế ki ôh tá hlê plĕng".

Pôa Bùi Ngọc Nghiễm, Chi hô̆i hô̆i trưởng dêi Khu mâu hơnăm hiăng krâ thôn Tân Hạ, tối, jâ K'Hạnh cho Ngế pơkuâ thôn kơhnâ hlối achê ƀă kuăn pơlê. Malối, klêi tơ'mot thôn, jâ mơhno ki rơkê ƀă ki loi tơngah dêi tơná.

“Tá hâi 'mot tơdjuôm K’Hạnh ối a thôn Tân Hạ ton pêi cheăng kơhnâ khât. Sap ing hâi tơdjuôm, nâ K'Hạnh xuân ối kơhnâ tiah mê há. Pêi cheăng achê ƀă kuăn pơlê. A mâu rôh hôp, K'Hạnh ai hiâm mơno vâ mơjiâng hlối kơhnâ khât, kuăn pơlê vâ môi tuăn... Nôkố pro kăn hnê ngăn pơkuâ thôn Tân Hạ ƀă Chơ Ré ton nah chiâng Tân Hạ nếo, xuân pêi cheăng tâi ivá, vâi krâ nhŏng o nếo tâ phĭu cho kơhnâ khât châ kơxô̆ phĭu 97, 98% mê’’.

Vâ chê 17 hơnăm pêi hnoăng cheăng a pơlê, jâ Cil K'Hạnh, Phŏ  hnê ngăn chi ƀô̆ hlối pro kăn thôn Tân Hạ, cheăm Tà Năng, kong pơlê Lâm Đồng hlo nhên khât hiâm mơno tơrŭm kuăn pơlê cho ivá pro chiâng rêm tơdroăng cheăng châ tơƀrê. Ing mâu tơdroăng pêi pro ki kŭn la ai pơxúa ƀă tơdroăng rêh ối, nâ dế chôa 'lâng veăng gum tah lôi ki kơtăn hơngế pơla péa thôn ton; vâ thôn Tân Hạ klêi kơ'nâi tơ'mot chiâng môi pơlê pơla tơrŭm, mơjiâng tơdroăng rêh ối nếo./.