Vi ƀan pơkuâ Kuô̆k hô̆i hiăng ai tơbleăng păng ‘nâng ‘na tơdroăng kơ-êng ƀă tiâ rơkong kơ-êng dêi hneăng hôp kố. Pơtối mê, mâu khu tơdroăng châ Kuô̆k hô̆i rah xo kơ-êng cho tơdroăng mơjiâng, tơdroăng tung khu cheăng, tơdroăng kal tiô troăng hyôh um tơvi, rơ’jíu ƀă Internet, tơdroăng séa ngăn. Khu tơdroăng má môi ối tung kơvâ mơjiâng, pôa Nguyễn Thanh Nghị, Ngế xiâm pơkuâ mơjiâng pro kế tơmeăm tiâ tơdjâk troh tơdroăng, troăng pêi mơdêk tơdroăng pơkâ pêi ƀă pơkuâ mơnhông tíu kơdrâm kuăn pơlê rêh ối tê mơdró dêi Việt Nam, ki má lối cho a mâu pơlê kong kân.

Pôa Phạm Minh Chính, Ngế pro xiâm hnê ngăn Chin phuh

Khu tơdroăng má péa ối tung kơvâ tơdroăng kal tiô troăng hyôh um tơvi, rơ’jíu ƀă Internet, pôa Nguyễn Mạnh Hùng, Ngế xiâm pơkuâ tơdroăng kal tiô troăng um tơvi, rơ’jíu ƀă Internet tiâ tơdroăng tơdjâk troh tơdroăng xúa kŏng ngê̆ thong tin tung pơkuâ tơnêi têa, mơjiâng Chin phuh xúa kŏng ngê̆, khu râ kăn pơkuâ xúa kŏng ngê̆. Khu tơdroăng má pái ối tung kơvâ tơdroăng kăn ƀô̆ pêi cheăng, jâ Phạm Thị Thanh Trà, Ngế xiâm pơkuâ kăn ƀô̆ kô tiâ ‘na tơdroăng rah xo kăn ƀô̆ pêi cheăng tung tơnêi têa, kơdroh ƀiên chê̆, mơjiâng tơdroăng cheăng tíu cheăng ƀă vêh rah ăm tơtro khu kăn ƀô̆, kŏng chưk, viên chưk ƀă tơdroăng po rơdâ pêi pro pơ’lêh liăn khế ƀă kăn ƀô̆, kŏng chưk, viên chưk.

Khu tơdroăng má pŭn, ối tung kơvâ séa ngăn, pôa Đoàn Hồng Phong, Kăn xiâm séa ngăn Chin phuh tiâ tơdrêng ‘na mơdêk châ tơƀrê tơdroăng séa ngăn, teăm tơdrêng hbrâ mơdât pro xôi luât. Mơ’nui roh kơ-êng, pôa Phạm Minh Chính, Ngế pro xiâm hnê ngăn Chin phuh kô mơnhên mâu tơdroăng ki tơdjâk ƀă tiâ rơkong kơ-êng dêi kăn teăng mâ Kuô̆k hô̆i.