VOV4.Xơ Đăng - Kơxê lơ 19/9, pôa Phạm Minh Chính, Ngế pro xiâm hnê ngăn Chin phuh hiăng krếo phôn tơpui tơno ƀă pôa Lý Khắc Cường, Ngế pro xiâm hnê ngăn ngăn kong têa Sinuâ. Péa ngế pro xiâm hnê ngăn tối tơdroăng ki kal tung tơrŭm cheăng pơla Việt Nam - Sinuâ ƀă tơrêm tơnêi têa, khĕn kơdeăn khât hnoăng tơrŭm pêi cheăng pơla péa pâ tung hơnăm hdrối kố nah. Tơrŭm cheăng tê mơdró pơtối rak ki tâk, tơdroăng hâ ho ki pro mơdon hâi khế a mâu tíu tê mơdró tơkăng kong choâ ‘lâng tơkâ luâ xơpá.

Tơdroăng Sinuâ ’no liăn cheăng a Việt Nam pơtối tâk. Tơrŭm hbrâ mơdât pơreăng châ rak vế pêi pro tơ-brê. ‘Na troăng rơhlâ tơrŭm cheăng tung la ngiâ, péa Ngế pro xiâm hnê ngăn tơnêi têa vâ môi tuăn mơdêk tơrŭm cheăng trâm mâ tơrá mâu kăn ƀă rêm râ, mơdêk mâu tơdroăng cheăng ăm rế trâu rơdâ, rế xông tơƀrê tơniăn, tơtro, krá ton; mơdêk trâm tơpui tơno, prôk vêh pơla kuăn pơlê dêi péa tơnêi têa.

Pôa Phạm Minh Chính, Ngế pro xiâm hnê ngăn Chin phuh krếo phôn tơpui ƀă pôa Lý Khắc Cường, Ngế pro xiâm hnê ngăn kong têa Sinuâ

Pôa Phạm Minh Chính pơkâ thế péa pâ mơ-eăm tơrŭm vâ mơnhông cheăng tê mơdró pơla péa pâ tâk tơniăn, tơdâng tơ’mô; pơkâ thế Sinuâ pro tơ’lêi hlâu ‘na tê mơdró, po rơdâ rôe tơmeăm khoăng, malối mơdêk rĕng po rơdâ tê mơdró tơmeăm pêi lo ing chiâk deăng Việt Nam; ‘mâi mơnhông tâi tâng mâu tơdroăng cheăng a mâu tíu tê mơdró tơkăng kăng ƀă mơdêk ivá cheăng a tíu tê mơdró; tơrŭm tơbleăng ƀă xúa tro rôh lo ing mâu khu tê mơdró tơniăn hên troăng.

Gương tơplôu ƀă tơbleăng