A Hà Nội, pôa Phạm Minh Chính, Ngế pro xiâm hnê ngăn Chin phuh pơkuâ hâi pêi cheăng pơla Khu kăn Chin phuh ƀă Khu kăn ngăn ‘na  mơdró kâ krâ kơvâ ƀă kŭn (SME) ‘na tơdroăng cheăng dêi khu, khu mơdró kâ SME ƀă mâu troăng rơhlâ  tah xơpá, tơvâ tơvân ăm khu mơdró.

Klêi tơmâng hnê tối dêi Khu mơdró SME, mâu khu mơdró ƀă tơdroăng tiâ mơnhên, tối mâu troăng rơhlâ pêi pro dêi mâu khu xiâm, kơvâ cheăng ƀă mâu kăn dêi mâu hngêi rak liăn, tối mơgêi rôh pêi cheăng, pôa Phạm Minh Chính,  Ngế pro xiâm hnê ngăn Chin phuh đi đo tơmâng, tối vâ ‘nâi mâu tơdroăng ki mơ-eăm vâ pơkâ mâu troăng rơhlâ tah ki xơpá tơvâ tơvân ăm khu mơdró, môi tiah mâu luât pơkâ tŏng kum nâp hnoăng mung tơnêi, kơdroh nâp hnoăng mơhá mung tơnêi, liăn ki thế nâp ki kố ki mê; tơkŭm tah ki xơpá, mơdêk mâu tíu tê mơdró phĭu liăn dêi mâu khu mơdró,  ‘na mơdró tơnêi tơníu hngêi trăng, mơdêk ‘mâi hơ’lêh tơdroăng cheăng, ‘mâi hơ’lêh ‘na ‘no liăn cheăng tê mơdró; kơjo kum khu mơdró rĕng vêh mơnhông tơƀrê krá tơniăn.