VOV4.Xơ Đăng - Kơxo lơ 3/8, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp Chin phuh tiah hmâ ‘na tơdroăng cheăng kâ rêh ối pơlê pơla khế 7 ƀă 7 khế apoăng hơnăm 2022; tơdroăng tơbleăng pêi pro Pơkâ kơxô̆ 01 dêi Chin phuh; tơdroăng tơbleăng Tơdroăng ‘mâi mơnhông ƀă mơdêk cheăng kâ rêh ối pơlê pơla ƀă hnoăng cheăng hbrâ mơdât pơreăng COVID-19.

Ngế pro xiâm hnê ngăn Chin phuh pơkuâ po rôh hôp Chin phuh tiah hmâ khế 7

Tơpui a rôh hôp, pôa Phạm Minh Chính tối nhên, khế 7 ƀă 7 khế hdrối nah cheăng kâ kân tơniăn, kâi hbrâ mơdât tơdroăng ki pro mơhrê liăn, rak vế tơniăn mơdêk, rak vế mâu tơdroăng pơkâ ki kân, tơdroăng ki tơbleăng pêi cheăng ‘mâi mơnhông rĕng; tơniăn tơdroăng kal kí, tơniăn tung pơlê pơla, tơniăn krê, hnoăng pơkuâ, tâi tâng tơnêi tơníu châ rak vế tơniăn; tơdroăng cheăng tơpui kâ châ mơdêk.

‘Na hnoăng cheăng khế 8 ƀă mâu khế pơtối, Ngế pro xiâm hnê ngăn tơnêi têa tối, tơdroăng xuân ối ôh tá tơniăn, xơpá vâ ‘nâi hdrối; mơnhên cho xơpá, pơloăng mơnúa hên tâ tung tơdroăng pơkâ; ki tơ’lêi hlâu; pôi tá tơngôu, hâk vâ, mơnhên hnoăng cheăng tung la ngiâ gá kô hngăm; xua mê kal tơkŭm tối leăng, mơnhên tối tơdroăng tung tơnêi têa ƀă a kong têa ê tơdrăng vâ pơkâ mơ’no troăng hơlâ tơtro.

Katarina Nga tơplôu ƀă tơbleăng