VOV4.Xơ Đăng - Kơxê măng lơ 19/9, a Tíu pêi cheăng Chin phuh, Rôh hôp ‘no tơdrêng ing troăng hyôh Internet dêi Ngế pro xiâm hnê ngăn Chin phuh ƀă mâu Kơ koan teăng mâ Việt Nam a kong têa ê ‘na mơdêk hnoăng cheăng tơpui kâ hiăng châ po tiô tơdroăng ki ‘no tơdrêng ing um tơvi ƀă ing troăng hyôh internet. Kố cho rôh hôp ki apoăng Ngế pro xiâm hnê ngăn Chin phuh ‘no hnê mơhno tơdrêng ‘na hnoăng cheăng tơpui kâ.

Rôh hôp kô tơkŭm tơpui tơno, mơnhên tối rôh tơ’lêi ƀă tơdroăng ki pơloăng mơnúa tung tơdroăng nôkố, malối cho mâu rôh tơ’lêi hlâu vâ Việt Nam kal pêi pro tơdrêng, tí tăng ‘nâi malối cho tơdroăng ki tê tơmeăm ngi kong têa ê, ‘no liăn cheăng, ôm hyô vâ mơhnhôk tâi mâu tơdroăng ki veăng tơlo mâu kơxô̆ liăn kum ‘mâi mơnhông ƀă mơdêk cheăng kâ, rêh ối pơlê pơla; ing mê, pơkâ  mơ’no mâu troăng hơlâ vâ mơdêk rơdêi mâu tơdroăng cheăng tơpui kâ a tơnêi têa ƀă a kong têa ê vâ tơkâ luâ mâu tơdroăng xơpá ki hdrối ƀă pro chiâng ivá vâ pêi pro hơ’lêh mâu tơdroăng pơlâ mơnhông mơdêk cheăng kâ rêh ối pơlê pơla.

Tâ tá rôh hôp

Tơpui a rôh po hneăng hôp, pôa Phạm Minh Chính, Ngế pro xiâm hnê ngăn Chin phuh pơkâ thế mâu kăn teăng mâ, mâu khu xiâm kơvâ cheăng, khu mơdró kâ, mơdêk tuăn ngoâ rơkê, tơpui tơno, pơkâ mơ’no mâu troăng hơlâ mơdêk teăm tơdrêng mâu tơdroăng cheăng tơpui kâ tơnêi têa ƀă a kong têa ê; tối mâu tơdroăng ki tơchĕng tơmiât, tơdroăng ki rơhêng vâ; pơkâ mơ’no, pâ thế ‘na troăng hơlâ, liăn ngân vâ mơdêk tơƀrê hnoăng cheăng tơpui kâ ‘na cheăng kâ.

Katarina Nga tơplôu ƀă tơbleăng