VOV4.Xơ Đăng - Kơxê lơ 5/9, a tíu pêi cheăng Chin phuh, pôa Phạm Minh Chính Ngế pro xiâm hnê ngăn tơnêi têa hiăng tơdah kăn teăng mâ Mih, cho pôa John Kerry, Ngế xiâm ngăn ‘na hyôh kong prâi lâp plâi tơnêi lăm pôu pêi cheăng a Việt Nam.

A rôh tơdah, péa ngế kăn vâ môi tuăn mơdek tơrŭm cheăng tung tâi tâng dêi Việt Nam - Mih rế ton rế krá kak, trâu rơdâ, hlối nhoăm dêi rơpó tơniăn, hnoăng pơkuâ dêi tung tâi tâng tung lâp tơnêi têa ƀă luât pơkâ kal kí dêi rơpó, rơtế mơ-eăm pêi troh tơdroăng ki nếo tung tơrŭm cheăng pro tơ’lêi hlâu ăm dêi rơpó.

Pôa Phạm Minh Chính hâk mơnê kơ Mih mơdêk tơrŭm ƀă mâu kong têa, ing mê veăng ‘no hnoăng kơhnâ khât tâ tăng pro hơniâp lĕm, tơniăn, tơrŭm tơrôa, mơnhông tơ-brê a kơpong. Việt Nam púi vâ Mih kô pơtối mơhno ki tơhrâ rơdêi ƀă tơdroăng môi tuăn hnoăng cheăng xiâm dêi ASEAN, tơrrŭm krá ƀă dêi rơpó pơla ASEAN - Mih ƀă khu tơrŭm Mekong - Mih.

Ngế pro xiâm hnê ngăn tơnêi têa tơdah ngế kum pêi hnoăng cheăng dêi Mih ngăn ‘na hyôh kong prâi hơ’lêh. (Um: TTXVN)

Pôa Kerry tối, Mih môi tuăn nhoăm tơdroăng tơrŭm tâi tâng ƀă Việt Nam, môi tuăn ƀă Việt Nam pro hnoăng cheăng ki xiâm hbrâ rơnáu, ki khât a kơpong ƀă tung tơdroăng hbrâ ví mâu tơdroăng tung lâp plâi tơnêi tung mê ai hyôh kong prâi hơ’lêh.

Gương tơplôu ƀă tơbleăng