VOV4.Xơ Đăng - Kơxê hâi lơ 14/9, pôa Phạm Minh Chính, Ngế pro xiâm hnê ngăn tơnêi têa tơdah pôa Hayashi Nobumitsu, Kăn xiâm pơkuâ Hngêi arak liăn Tơrŭm lâp plâi tơnêi kong têa Nhuk dó inâi (JBIC) troh lăm pôu ƀă pêi cheăng a Việt Nam. Ngế pro xiâm hnê ngăn tơnêi têa mơnhên Việt Nam đi đo ngăn Nhuk cho khu tơrŭm cheăng ton xŏn ki kal má môi, ton xŏn, môi tuăn Nhuk veăng kum hên ăm mơjiâng hơniâp lĕm ƀă mơnhông dêi kơpong ƀă lâp plâi tơnêi. Ngế pro xiâm hnê ngăn tơnêi têa pơkâ thế Kăn xiâm pơkuâ hngêi arak liăn tơmâng tŏng kum, pơtối tơrŭm rơtế ƀă mâu kơ koan Nhuk thăm pêi pro rơdêi, po rơdâ tơrŭm cheăng pro tơniăn cheăng kâ klêi kơ’nâi COVID-19, tŏng kum Việt Nam mơjiâng tơdroăng cheăng kâ tơniăn krê, pơkuâ xêh ƀă châ tơƀrê lĕm, hbrâ tơrŭm lâp plâi tơnêi trâu hơngế, păng ‘nâng, châ tơƀrê; mơjiâng on tơhrik ki vêh pro.

Ngế pro xiâm hnê ngăn Chin phuh tơdah Kăn xiâm pơkuâ Hngêi arak liăn Tơrŭm lâp plâi tơnêi Nhuk

Kăn xiâm pơkuâ JBIC môi tuăn ƀă hên pơkâ tơrŭm cheăng dêi Ngế pro xiâm hnê ngăn tơnêi têa, tung mê, ai tơdroăng tơdjâk tơdroăng tơkêa bro kơmăi chuâ hrik têa châu Nghi Sơn; kheăn kơdeăn ivá pơkuâ, hnê mơhno, pơkuâ dêi Chin phuh Việt Nam, Việt Nam hiăng rak krá tơniăn cheăng kâ kân tung pơla lâp plâi tơnêi ai hên tơdroăng ôh tá tơniăn.